ویب ڈیسک: سکھوں کے روحانی پیشوا بابا گورونانک کے جنم دن کی تقریبات میں شرکت کیلئے پاکستانی ہائی کمیشن نئی دہلی نے 3 ہزار سے زائد سکھ یاتریوں کو ویزے جاری کر دیئے۔
ہائی کمیشن کے اعلامیے کے مطابق یاتریوں کو 14 سے 23 نومبر تک کا ویزا جاری کیا گیا ہے ، پاکستانی ناظم الامور سعد وڑائچ نے یاتریوں کو مبارکباد دیتے ہوئے کہا ہے کہ یاتریوں کے لیے کامیاب یاترا کی خواہش ہے۔
بھارتی یاتری 14 نومبر کی صبح واہگہ بارڈر کے راستے پاکستان آئیں گے ، گورونانک دیو جی کے 555 ویں جنم دن کی تقریب 15 نومبر کو گوردوارہ جنم استھان ننکانہ صاحب میں ہو گی۔
10 روزہ قیام کے دوران سکھ یاتری گوردوارہ پنجہ صاحب حسن ابدال، گوردوارہ سچا سودا فاروق آباد، گوردوارہ روڑی صاحب ایمن آباد کی بھی یاترا کریں گے۔
یاد رہے کہ وزیر داخلہ محسن نقوی کے مطابق سکھ یاتریوں کیلئے پاکستان آمد پر ویزہ کی کوئی فیس نہیں ہو گی، حسن ابدال، ننکانہ صاحب، کرتاپور کے علاوہ بھی کسی جگہ جانا چاہیں تو اوپن کریں گے، کچھ مسئلے اور مسائل ہیں ان کو بھی ختم کیا جائے گا۔