حافظ شہباز علی : قومی ہیرو ارشد ندیم استنبول ایئرپورٹ پہنچ گئے ۔
پاکستان کے قونصل جنرل نعمان اسلم نے ایئرپورٹ پر ارشد ندیم کو تحائف پیش کیے، انہوں نے کہا کہ ارشد ندیم ہمارے ہیروہیں ، ارشد ندیم نے عالمی سطح پر پاکستان کا نام روشن کیا ۔
ارشد ندیم استنبول سے آج رات لاہور پہنچیں گے۔
واضح رہے کہ لاہور ائیر پورٹ پر ارشد ندیم کا فقید المثال استقبال کیا جائے گا ، اتھلیٹکس فیڈریشن آف پاکستان کے عہدیدار اپنے ہیرو کے استقبال کی تیاریوں میں مصروف ہیں۔ صدر اتھلیٹکس فیڈریشن آف پاکستان بریگیڈیئر(ر) وجاہت حسین ساہی ائیر پورٹ پر ارشد ندیم کا استقبال کریں گے ۔
دوسری جانب سپورٹس بورڈ پنجاب کے عہدیداران بھی استقبال کے لیے تیار ہیں۔ وزیر اعظم کے مشیر برائے امور نوجوانان رانا مشہود ائیر پورٹ پر استقبال کریں گے۔