(سٹی42)بھارتی فلم انڈسٹری کی مشہور اداکارہ ثناء خان نے فلم انڈسٹری کو چھوڑ کر اپنی زندگی اسلام کے لئے وقف کرنے کا اعلان کردیا ، اس بات کی تصدیق انہوں نے انسٹاگرام پر ایک پوسٹ پر کی۔
تفصیلات کے مطابق بھارتی فلم انڈسٹری کی مشہور اداکارہ اور بگ باس کے سیزن 6 سے شہرت حاصل کرنے والی ثناء خان نے اسلام کی خاطر شوبز کو ترک کردیا۔ اداکارہ کی جانب سے ایک طویل پوسٹ لکھی گئی جس کے سامنے آنے پر لوگوں نے ان کی حوصلہ افزائی کی اور مذہب اسلام کےلئے اپنی آنے والی زندگی گزارنے پر انہیں خوش آمدید کہا، اداکارہ نے انسٹاگرام پر طویل تحریر میں لکھا کہ ’آج میں اپنی زندگی کے ایک اہم موڑ پر آپ سے بات کر رہی ہوں، میں سالوں سے شوبز کی زندگی گزار رہی ہوں اور اس عرصے میں مجھے ہر طرح کی شہرت، عزت اور دولت اپنے چاہنے والوں کی طرف سے نصیب ہوئی۔
جس کے لیے میں ان کی شکر گزرا ہوں لیکن اب کچھ دن سے مجھ پر یہ احساس قبضہ جمائے ہوئے ہے کہ انسان کے دنیا میں آنے کا مقصد صرف یہی ہے کہ وہ دولت اور شہرت کمائے؟’کیا اس پر یہ فرض عائد نہیں ہوتا کہ وہ اپنی زندگی ان لوگوں کی خدمت میں گزارے جو بے آسرا اور بے سہارا ہیں؟
ثناء خان نے سوالیہ انداز اپناتے ہوئے کہا کہ’کیا انسان کو یہ نہیں سوچنا چاہیے کہ اسے کسی بھی وقت موت آسکتی ہے؟ اور مرنے کے بعد اس کا کیا بننے والا ہے؟ ان دو سوالوں کےجواب میں مدت سے تلاش کر رہی ہوں، خاص طور پر اس دوسرے سوال کا کہ مرنے کے بعد میرا کیا بنے گا؟
ثناء خان نے مزید بتایا کہ ’اس سوال کا جواب میں نے اپنے مذہب میں تلاش کیا تو مجھے پتہ چلا کہ دنیا کی یہ زندگی اصل میں مرنے کے بعد زندگی کو بہتر بنانے کے لیے ہے اور وہ اسی صورت میں بہتر ہوگی جب بندہ اپنے پیدا کرنے والے کے حکم کے مطابق زندگی گزارے اور صرف دولت و شہرت کو اپنا مقصد نہ بنائے بلکہ گناہ کی زندگی سے بچ کر انسانیت کی خدمت کرے اور اپنے پیدا کرنے والے کے بتائے ہوئے طریقوں پر چلے'
آخر میں ثناءخان نے مداحوں کو بتایا کہ میں آج یہ اعلان کرتی ہوں کہ آج سے میں اپنی شوبز کی زندگی چھوڑ کر انسانیت کی خدمت اور اپنے پیدا کرنے والے کے حکم پر چلوں گی اور اس پر پختہ رہوں گی، انہوں نے درخواست کی کہ’مجھے آئندہ کبھی شوبز کے کسی کام کے لیے دعوت نہ دیں۔
بالی ووڈ میں اداکاری کے جوہر دکھاتے ہوئے ثناء خان نے مشہور فلمیں سائن کیں، ان میں ’یہی ہے ہائی سوسائٹی‘، ’بمبئی ٹو گوا‘، ’ہلّہ بول‘، ’جے ہو‘، ’وجہ تم ہو‘ اور ’ٹوائلٹ‘ جیس فلموں میں اداکاری کے جوہر دکھائے ہیں۔