نشتر پارک ( سپورٹس ڈیسک) پاکستان میں قائم دنیا کا سب سے بڑا ہاکی سٹیڈیم ''نیشنل ہاکی سٹیڈیم''بھی تباہ ہونے لگا، دیکھ بھال نہ ہونے کے باعث سٹیڈیم کی کرسیاں ، سٹینڈز اور فرش ٹوٹ پھوٹ کا شکار اور ٹروف پہلے ہی کھیل کے قابل نہیں رہی۔
نشتر پارک سپورٹس کمپلیکس لاہور میں دنیا کا سب بڑا ہاکی اسٹیڈیم قائم ہے تاہم انتظامیہ کی غفلت اور لاپرواہی کے باعث اب یہ سٹیڈیم تباہ ہونے لگا، قومی کھیل تو عرصہ دراز سے ملک میں زوال پذیر ہے، قومی ٹیم جو رینکنگ میں کبھی نمبر ون مانی جاتی تھی آج اس کی 18 ویں پوزیشن ہے، ہاکی کی طرح، سب سے بڑا سٹیڈیم بھی آہستہ آہستہ تباہ رہا ہے، اسٹیڈیم کے اسٹینڈز ٹوٹ پھوٹ کا شکار ہیں، صفائی ستھرائی نہ ہونے کی وجہ سے سٹینڈز تباہ حالی کا منظر پیش کرنے لگے۔
سٹیڈیم میں موجود کرسیاں ٹوٹتی جارہی ہیں، ان کے رنگ بھی اڑ گئے ہیں جبکہ نیشنل ہاکی سٹیڈیم کی ٹرف بھی کھیلنے کے قابل نہیں، یہی وجہ ہے کہ قومی کیمپ گرائونڈ نمبر دو پر لگتے ہیں۔ویمن ہاکی اکیڈمی کی کھلاڑی مجبوری میں اسی خراب ٹرف پر ٹریننگ کرتی دکھائی دیتی ہیں، حیرت کی بات یہ کہ سپورٹس بورڈ پنجاب اور پاکستان ہاکی فیڈریشن کے دفاتر اسی اسٹیڈیمز میں موجود ہیں اور اسٹیڈیم کے تمام انتظامی امور سپورٹس بورڈ پنجاب ہی کے پاس ہیں۔