ویب ڈیسک: اینیمیشن فلموں میں کتّے اور جانوروں کے استعمال سے آگے بڑھ کر فلموں کے کردار کو کارٹون میں ڈھالنے والے مشہور بھارتی فلم ساز پرتیش نندی73 برس کی عمر میں انتقال کرگئے۔
بھارتی میڈیا رپورٹ کے مطابق مشہور ایڈورٹائزنگ ایگزیکٹیو اور فلم ساز پرتیش نندی جو بھارتی فلم انڈسٹری کے نمایاں پروڈیوسرز میں شامل تھے، بدھ کے روز دل کا دورہ پڑنے سے جنوبی ممبئی میں اپنے گھر میں انتقال کر گئے۔
انہوں نے اپنے کیرئیر میں کئی کامیاب فلمیں پروڈیوس کیں، جن میں ’جھانکار بیٹس’، ’چمبیلی’، ’ہزاروں خواہشیں ایسی’، ’ایک کھلاڑی ایک حسینہ’، ’ان کہی’، ’پیار کے سائیڈ ایفیکٹس’، ’بو بیرکس فار ایور’ اور دیگر شامل ہیں۔فلمساز کے انتقال کی خبر بالی وڈ کے سینئر اداکار انوپم کھیر کی جانب سے ایک جذباتی پوسٹ کی صورت میں سامنے آئی جس میں انہوں نے پرتیش نندی کے انتقال پر افسوس کا اظہار کرتے ہوئے لکھا تھا کہ’میرے قریبی دوست ’پرتیش نندی’ کے انتقال کی خبر سن کر دل شکستہ اور صدمے میں ہوں۔’
انہوں نے پرتیش نندی کو ’بہادر‘ قرار دیتے ہوئے بتایا کہ وہ ان کے ابتدائی دنوں میں ان کے لیے ایک سپورٹ سسٹم تھے، انوپم کھیر نے لکھا کہ،’وہ ایک شاندار شاعر، مصنف، فلم ساز، اور منفرد ایڈیٹر/صحافی تھے۔ وہ میری زندگی کے ابتدائی دنوں میں ایک عظیم طاقت کا ذریعہ تھے۔ ہم نے کئی چیزیں ایک ساتھ شیئر کیں۔’
اداکار نے اپنی جذباتی پوسٹ میں مزید لکھا کہ’وہ ان لوگوں میں سے ایک تھے جنہیں میں نے سب سے زیادہ بے خوف پایا۔ ہمیشہ بڑے دل اور عظیم شخصیت کے مالک تھے۔میں نے ان سے بہت کچھ سیکھا۔ حالیہ دنوں میں ہم زیادہ نہیں ملے، لیکن ایک وقت تھا جب ہم ایک دوسرے کے بغیر نہیں رہ سکتے تھے! میں کبھی نہیں بھول سکتا جب انہوں نے مجھے فلم فیئر کے کور پر اور خاص طور پر ’دی السٹریٹڈ ویکلی’ کے کور پر حیرت انگیز طور پر شامل کیا۔ وہ یاروں کا یار کی حقیقی تعریف تھے!’۔
یاد رہے کہ فلمساز پرتیش نندی 15 جنوری 1951 کو بھاگلپور، بہار میں پیدا ہوئے۔ وہ ایک معروف صحافی اور میڈیا شخصیت بھی تھے۔ 1990 کی دہائی میں انہوں نے دوردرشن پر ایک مشہور ٹاک شو ’دی پرتیش نندی شو’ کی میزبانی کی۔علاوہ ازیں پرتیش نندی نے 1998 سے 2004 تک شیو سینا پارٹی کی نمائندگی کرتے ہوئے راجیہ سبھا کے رکن کی حیثیت سے بھی خدمات انجام دیں۔