(قذافی بٹ) وزیر اعلی پنجاب کی معاون خصوصی ڈاکٹر فردوس عاشق اعوان کا کہنا ہے کہ اپوزیشن نے سانحہ مچھ پر مگرمچھ کے آنسو بہائے۔ مریم نواز کی موسیقی سننے کی ویڈیو سے قوم اندازہ لگا لے کہ ہاتھی کے دانت کھانے کے اور دکھانے کے اور ہیں۔
فلیٹز ہوٹل میں حکیم سعید فاونڈیشن کے زیر اہتمام طلبا میں تعلیمی اسکالر شپ کے چیک تقسیم کرنے کی تقریب ہوئی۔ ڈاکٹر فردوس عشق اعوان نے ایک بار پھر اپوزیشن کو تنقید کا نشانہ بناتے ہوئے کہا کہ سیاسی گدھ سانحہ مچھ پر مگرمچھ کے آنسو بہاتے رہے ۔ سابقہ ادوار میں بھی دہشت گردی کے واقعات ہوئے لیکن ظل سبحانی کی جعلی راجکماری کبھی ایسے افسوس کرنے نہیں گئیں ۔
انہوں نے کہا کہ چودھری پرویز الہی وزیراعلی عثمان بزدار کے راستے سے کانٹوں کو چن رہے ہیں، ن لیگی اراکین اسمبلی نے سپیکر سے ملاقات میں اپنی لیڈرشپ کے بیانئے سے خود کو الگ کرلیا ہے۔ فردوس عاشق اعوان نے کہا کہ سابقہ حکومتیں اداروں کو کمزور کرنے میں مصروف رہیں وہ اداروں کو مضبوط کررہے ہیں ۔ فارن فنڈنگ کیس میں تحریک انصاف سرخرو ہوگی ۔