ویب ڈیسک :انڈر 19 ایشیا کپ کے فائنل میں بنگلا دیش نے بھارت کو ہرا دیا اور 59 رنز سے شکست دے کر ٹائٹل اپنے نام کر لیا۔
دبئی میں بنگلادیش کی اننگز کا آغاز تو اچھا نہ رہا، کلام صدیقی ایک رن بنا کر آؤٹ ہوگئے لیکن اس کے بعد رنز بھی بنتے رہے اور وکٹیں بھی گرتی رہیں۔بنگلادیشی ٹیم آخری اوور میں 198 رنز بنا کر آؤٹ ہوگئی۔ محمد شہاب 40 ، رضان حسین 47 اور فرید حسن 39رن کے ساتھ نمایاں رہے۔
ہدف کے تعاقب میں بھارتی ٹیم شروع ہی سے مشکل میں رہی۔ پہلی وکٹ چار پر گئی اور پھر وکٹیں گرتی چلی گئیں۔ بنگلہ دیشی باولر عزیزالحکیم اور اقبال حسین نے تین تین وکٹیں حاصل کیں ۔بھارتی کپتان محمد امان 26 رنز کے ساتھ ٹاپ اسکور ر ہے اور پوری ٹیم 139 رن پر ڈھیر ہو گئی، یوں بنگلادیش نے بھارت کو 59 رنز سے ہرا کر ٹائٹل بھی اپنے نام کرلیا۔