سٹی 42 : پنجاب کی وزیراعلیٰ مریم نواز 8 روزہ سرکاری دورے پر چین پہنچ گئیں، بیجنگ ایئرپورٹ پر ان کا پرتپاک استقبال کیا گیا۔ 

بیجنگ ایئرپورٹ پر استقبال کیلیے کمیونسٹ پارٹی آف چائنا کے 6 اعلیٰ عہدیدار موجود تھے، مریم نواز کو ایئرپورٹ پر گلدستہ پیش کیا گیا، چین میں پاکستان کے سفیر خلیل ہاشمی اور ان کی اہلیہ نے بھی مریم نواز کا خیر مقدم کیا۔

وزیر اعلیٰ مریم نواز نے کیمونسٹ پارٹی آف چائنا کے اعلیٰ سطحی وفد سے ملاقات کی۔ سربراہ چینی وفد نے مریم نواز اور ان کے وفد کی آمد پر شکریہ ادا کیا۔ مریم نواز نے کہا کہ پاک چین دوستی بلندی کی انتہاؤں کی طرف گامزن ہے، چین کے اشتراک سے پنجاب کو اقتصادی اور معاشی بلندیوں پر لے جانا چاہتے ہیں۔

واضح رہے کہ وزیر اعلیٰ مریم نواز کمیونسٹ پارٹی آف چائنا کی خصوصی دعوت پر چین روانہ ہوئی ہیں ۔ مریم نواز کے 8 روزہ دورے کی سرکاری مصروفیات کا آغاز کل سے ہوگا، مریم نواز چین کے اسپتال، اسکول اور دیگرا داروں کے دورے بھی کریں گی۔ اس کے علاوہ وہ بیجنگ، شنگھائی، شن ژین اور گوانگ ژوکے دورے کریں گی جبکہ مختلف ملاقاتیں، تقاریب اور کانفرنس میں بھی شرکت کریں گی۔ وزیر اعلیٰ مریم کے ہمراہ وفد میں مریم اورنگزیب، عظمیٰ بخاری اور دیگر شامل ہیں۔

یہ بھی یاد رہے کہ مریم نواز چین کا دورہ کرنے والی پہلی پاکستانی خاتون وزیر اعلیٰ ہیں۔