سٹی 42 : مری میں بارش اور برف باری کا سلسلہ جاری ہے، پی ڈی ایم اے کی جانب سے آئندہ 24 گھنٹوں تک مزید بارش و برف باری کے امکانات ظاہر کیے گئے ہیں۔
ترجمان پی ڈی ایم اے کے مطابق آئندہ 24 گھنٹوں تک مزید بارش و برف باری کے امکانات ہیں، بارش اور برف باری کے باعث سڑکوں پر ٹریفک کی روانی متاثر ہوسکتی ہے ۔ سڑکوں پر انتظامیہ کی جانب سے نمک کا چھڑکاؤ کیا جارہا ہے ۔
ڈی جی پی ڈی ایم اے عرفان علی کاٹھیا کی جانب سے مری انتظامیہ کو الرٹ رہنے کی ہدایات کی گئی ہیں۔ ڈی جی عرفان علی کاٹھیا کا کہنا ہے کہ انتظامیہ الرٹ ر ہے ، کسی قسم کی غفلت کا مظاہرہ نہ کیا جائے، ہیوی مشینری کے استعمال سے برف کو ساتھ ساتھ ہٹایا جائے، شاہراہوں پر ٹریفک کی روانی کو یقینی بنایا جائے۔ انہوں نے کہا کہ سیاحوں کو موسم کی مناسبت سے سہولیات فراہم کرنا انتظامیہ کی ذمہ داری ہے۔
ڈی جی عرفان علی نے بتایا کہ مری میں سیاحوں کی رہنمائی کے لیے 13 فسیلیٹیشن مراکز قائم ہیں، سیاحوں سے گزارش ہے کہ موسم کی صورت حال کا جائزہ لے کر سفرپر نکلیں۔ انہوں نے کہا کہ مری ملکہ کوہسار ہے ، کوشش ہے کہ کوئی ناخوشگوار واقعہ نہ ہو ، تمام ادارے عوام الناس کی خدمت میں مصروف ہیں، شہری احتیاط کریں اور غیر ضروری سفر سے گریز کریں ۔