ویب ڈیسک : کشمور پولیس نے کچے کی طرف جانے والا ٹرک روکا، جس میں سے بڑی مقدار میں اسلحہ برآمد ہوا، پولیس نے ٹرک میں موجود 7 ملزمان کو بھی گرفتار کرلیا۔

کشمور پولیس کی جانب سے انٹیلی جنس بیسڈ کارروائی کی گئی، پولیس نے تھانہ اے سیکشن کی حدود میں کچے کی طرف جانیوالے ٹرک کو روک لیا۔ پولیس کے مطابق ٹرک میں بھاری مقدار میں اسلحہ رکھا گیا تھا۔

پولیس نے بتایا کہ ٹرک سے برآمد  کیے گئے اسلحے میں 4 ایس ایم جیز، 12 ہزار گولیاں، 35 ایس ایم جی میگزین، 4 جی تھری، 4 ایم فور رائفل، 20 میگزین، 2 پستول اور 200 گولیاں بھی شامل ہیں۔

پولیس نے ٹرک میں سوار 7 ملزمان کو بھی گرفتار کرلیا ۔ ایس ایس پی کشمور نے کہا کہ گرفتار ملزمان میں علی بخش گبول، عبدالشکور، فرمان ملک، اویس ابڑو، عبدالقادر ابڑو، مجاہد حسین اور شاہ میر سبزوئی شامل ہیں۔

ایس ایس پی نعمان ظفر نے بتایا کہ یہ اسلحہ ڈاکوؤں کے مختلف گینگ کو سپلائی کیا جانا تھا۔