احمد منصور : پی اے ایف اکیڈمی اصغرخان، رسالپور میں آج مختلف کورسز کی گریجوایشن پریڈ ہوئی۔ چیئرمین جوائنٹ چیفس آف اسٹاف کمیٹی جنرل ساحر شمشاد مرزا مہمان خصوصی تھے، پاس آؤٹ کیڈٹس نے مہمان خصوصی کو سلامی دی۔ پاک فضائیہ کے سربراہ ایئر چیف مارشل ظہیر احمد بابر سدھو بھی تقریب میں موجود تھے۔
جنرل ساحر شمشاد مرزا نے پریڈ کا معائنہ کیا، مجموعی طور پر 139 ایوی ایشن کیڈٹس، 8 جینٹل مین کیڈٹس اور 2 نیول کیڈٹس پاس آؤٹ ہوئے۔ چیئرمین جوائنٹ چیفس آف اسٹاف کمیٹی ٹرافی برائے جنرل سروس ٹریننگ میں مجموعی بہترین کارکردگی ایوی ایشن کیڈٹ اسپورٹس سارجنٹ عمران رضا نے حاصل کی۔ کامبیٹ سپورٹ کورس میں بہترین کارکردگی پر ایوی ایشن کیڈٹ عثمان رشید نے ٹرافی حاصل کی۔ ایئر ڈیفنس کورس میں بہترین کارکردگی کی ایئر چیف آف اسٹاف ٹرافی ایوی ایشن کیڈٹ سارجنٹ حسیب عبد المالک نے حاصل کی۔
پاکستان نیول کیڈٹ سارجنٹ حافظ علی اسد کو کالج آف ایروناٹیکل انجینئرنگ میں مجموعی بہترین کارکردگی پر معزز سوَرڈ آف آنر سے نوازا گیا۔ کالج آف فلائنگ ٹریننگ میں مجموعی بہترین کارکردگی پر سوَرڈ آف آنر ایوی ایشن کیڈٹ، اکیڈمی انڈر آفیسر عبداللہ سعد علی نے حاصل کی ۔ چئیرمین جوائنٹ چیفس آف سٹاف کمیٹی نے گریجویٹ ہونے والے کیڈٹس اور ان کے اہل خانہ کو مبارکباد دی ۔
پریڈ کے اختتام پر پی اے ایف اکیڈمی کی ایروبیٹکس ٹیم "شیر دل" نے شاندار فضائی کرتب دکھائے، پی اے ایف کے میراج، ایف 16، جے ایف 17 تھنڈرز اور جے-ل 10 سی فائٹر جیٹس نے شاندار فلائنگ فارمیشن کی صورت میں مہارت دکھائی۔
پریڈ میں اعلیٰ فوجی اور سول حکام اور پاس آئوٹ ہونے والےکیڈٹس کے والدین نے شرکت کی ۔