سٹی42:  امریکہ کے صدارتی الیکشن میں ڈونلڈ ٹرمپ کی جیت پر  چین اور روس کے  سرکاری سطح پر تبصرےسامنے آئے ہیں جن میں ٹرمپ کے صدر بننے کے بعد  رویئے کو دیکھنے کا عندیہ دیا گیا ہے۔

 چین کے رسمی تبصرے میں کہا گیا ہے کہ چین امریکہے ساتھ باہمی احترام کی بنیاد پر کام کرتا رہے گا۔  وزارت خارجہ کے ترجمان ماؤ ننگ نے بدھ کو بیجنگ میں ایک پریس بریفنگ کے دوران کہا کہ امریکہ کے بارے میں ہماری پالیسی مستقل ہے اور ہم امریکہ سے تعلقات کو باہمی احترام، پرامن بقائے باہمی اور تعاون کے اصولوں کے مطابق جاری رکھیں گے۔

چین میں کسی سرکاری اہلکار کی جانب سے اب تک ڈونلڈ ٹرمپ کے انتخابی نعرے کہ وہ جیت گئے تو امریکہ میں چین کی امپورٹس پر ساٹھ فیصد ڈیوٹی لگا دیں گے، اب تک کوئی تبصرہ نہیں کیا گیا۔ 

مختلف صحافتی ذرائع نے البتہ بتایا ہے کہ چینی  سٹریٹیجک ماہرین  کو  ٹرمپ سے مزید آتش فشاں بیانات  کی توقع ہے۔ کچھ نے کہا کہ ٹرمپ کی آئیسولیشنسٹ پالیسی چین کو اپنا عالمی اثر و رسوخ بڑھانے کے لیے جگہ فراہم کر سکتی ہے، چینی سٹریٹیجسٹوں کا یہ بھی کہنا ہے کہ چین تجارت، ٹیکنالوجی اور سیکیورٹی کے حوالے سے تلخ  دشمنی کے لیے تیار ہے۔

 کارنیگی اینڈومنٹ فار انٹرنیشنل پیس کی ٹونگ ژاؤ نے کہا  کہ چین نے امریکی انتخابات میں سخت مقابلے کی توقع کی تھی اور اگرچہ ٹرمپ کی جیت چین کا ترجیحی نتیجہ نہیں ہے اور خدشات کو بھی جنم دیتا ہے لیکن یہ غیر متوقع بھی نہیں ہے۔

  ٹرمپ کے صدر منتخب ہونے کے بعد بدھ کو روس نے کہا  کہ امریکہ اب بھی ایک دشمن ریاست ہے اور یہ  وقت  بتائے گا کہ یوکرین جنگ کے خاتمے کے بارے میں ٹرمپ کی بیان بازی حقیقت میں بدلتی ہے یا نہیں۔
  ماسکو میں روس  کی وزارتِ خارجہ کے ترجمان دمتری پیسکوو نے کہا کہ ٹرمپ نے اپنی انتخابی مہم کے دوران یوکرین کی جنگ کے خاتمے کے خواہشمند ہونے کے بارے میں کچھ اہم بیانات دیے تھے لیکن یہ وقت ہی بتائے گا کہ آیا ان باتوں پر کتنا عمل کیا جاتا ہے۔  پیسکوو نے کہا کہ ہمیں یہ نہیں بھولنا چاہیے کہ ہم ایک غیر دوست ملک کے بارے میں بات کر رہے ہیں جو  ہماری ریاست کے خلاف براہ راست اور بالواسطہ طور پر جنگ میں ملوث ہے۔

 پیسکوو نے کہا کہ وہ صدر ولادیمیر پیوٹن کی طرف سے ٹرمپ کو ان کی جیت پر مبارکباد  کے کسی منصوبے سے آگاہ نہیں ہیں،ان کا یہ بھی کہنا تھا کہ امریکہ کے ساتھ روس کے تعلقات ماضی کی نسبت انتہائی پست سطح پر ہیں۔

 پیوٹن کی طرف سے روسی حکام نے انتخابات سے پہلے کہا تھا کہ امرکہ کا صدارتی انتخاب جو بھی جیتے اس سے روس کو کوئی فرق نہیں پڑے گا،روسی وزارت خارجہ کا کہنا تھا کہ روس کو ٹرمپ کے بارے میں کوئی غلط فہمی نہیں ہے۔