سٹی 42 : چیمپئنز ٹرافی کے فائنل سے قبل نیوزی لینڈ کی ٹیم کے اہم فاسٹ بولر میٹ ہنری انجری کا شکار ہوگئے۔ 

 گروپ اسٹیج کے میچ میں بھارت کے خلاف 5 وکٹیں لینے والے نیوزی لینڈ کے فاسٹ بولر میٹ ہنری کی بھارت کے خلاف فائنل میں شرکت مشکوک ہوگئی ہے۔ اس حوالے سے  نیوزی لینڈ کے ہیڈ کوچ گیری اسٹیڈ نے دبئی میں میڈیا سے گفتگو کرتے ہوئے میٹ ہنری کی انجری کے بارے میں بتایا، کہا کہ کیوی پیسر کی فائنل میں شرکت کے امکانات تاحال غیر یقینی ہیں۔ 

33 سالہ میٹ ہنری لاہور میں جنوبی افریقا کے خلاف سیمی فائنل میں کیچ لیتے ہوئے انجری کا شکار ہوئے تھے جس کے بعد میٹ ہنری تکلیف میں دکھائی دیے اور گراؤنڈ سے باہر چلے گئے تھے مگر میٹ ہنری نے انجری کے ساتھ ہی جنوبی افریقا کی اننگز کے آخر میں 2 اوورز بھی کرائے تھے۔

نیوزی لینڈ کے ہیڈ کوچ گیری اسٹیڈ نے کہا مثبت بات یہ ہے کہ وہ دوبارہ بولنگ کے لیے آئے، ان کے اسکین کروائے گئے ہیں اور ہم انہیں کھیلنے کا ہر موقع دینا چاہتے ہیں لیکن وہ کافی تکلیف میں ہیں، امید ہے کہ وہ فائنل تک ٹھیک ہو جائیں گے۔ 

میٹ ہنری چیمپئنز ٹرافی کے سب سے کامیاب بولر ہیں جنہوں نے 16.70 کی اوسط سے 10 وکٹیں حاصل کیں جب کہ انہوں نے 2 مارچ کو دبئی میں بھارت کے خلاف گروپ میچ میں 5 وکٹیں حاصل کی تھیں۔

واضح رہے کہ بھارت اور نیوزی لینڈ کے درمیان ٹورنامنٹ کا فائنل اتوار 9 مارچ کو دبئی انٹرنیشنل کرکٹ اسٹیڈیم میں کھیلا جانا ہے۔