قومی ٹیم کے لئے ایک اور آل راؤنڈر  نظر آرہا ہے، محمد یوسف

ویب ڈیسک: ’’ پی ایس ایل‘‘ ہنگامہ میں سابق فاسٹ بالر محمد آصف کا کہنا تھا کہ لاہور قلندرز پرسکون ہونے کے چکر میں زیادہ ہی سکون میں آگئے جس کا پورا پورا فائدہ  پشاور زلمی نے اٹھایا اور میچ جیتے۔ 

تفصیلات کے مطابق پاکستان سپر لیگ 8 ، پشاور زلمی نے لاہور قلندرز کو 35رنز سے ہرادیا.پشاور کے207رنز کے جواب میں لاہور قلندرز 172رنز بنا کرآؤٹ ہوگئی۔’’پی ایس ایل ہنگامہ‘‘ میں تجزیہ کرتے ہوئے سابق قومی کرکٹر سلیم ملک کا کہنا تھا کہ لاہور قلندرز کی ٹیم کوالیفائی ہونے کے بعد بہت زیادہ پرسکون نظر آئی، ان کی باؤلنگ میں آج وہ  سپارک نہیں آیا جو عام طور پر نظر آتا ہے۔ دوسری جانب شاہین نے آج جس طرح بیٹنگ کی وہ پاکستان کے لئے مستقبل میں اچھی چیز ہے۔

سابق قومی کرکٹر محمد یوسف کا کہنا تھا کہ لاہور نے ویسی جان نہیں ماری۔ پشاور کے بیٹر صائم ایوب نے بہت شاندار کرکٹ کھیلی، مین آف دی میچ بھی بنا، اس نئے لڑکے کی بیٹنگ دیکھ کے بہت اچھا لگا، کیونکہ لاہور قلندرز کی باؤلنگ جو کہ شائد دنیا کی بہترین باؤلنگ ہے اس کے خلاف ایسی بیٹنگ کرنا بہت بڑی بات ہے، یہ ابھرتا ہوا کھلاڑی ہے کوئی شک نہیں کہ اس کا مستقبل روشن نظر آتا ہے۔

انہوں نے مزید کہا کہ شاہین جس طرح آکر کھیلا ہے، قومی ٹیم کے لئے ایک اور آل راؤنڈر  نظر آرہا ہے۔ 8ویں 9ویں نمبر پر اگر اس طرح کا بیٹسمین مل جائے تو قومی ٹیم کے لئے بہت فائدہ ہوسکتا ہے۔

سابق فاسٹ بالر محمد آصف کا کہنا تھا کہ لاہور قلندرز پرسکون ہونے کے چکر میں زیادہ ہی سکون میں آگئے، جس کا پشاور زلمی نے پورا پورا فائدہ اٹھایا اور میچ جیت گئے۔ شاہین کپتانی کا کردار بہت اچھا نبھا رہا ہے، جس طرح آج بھی اوپر آکر اس نے کھیلا اور نصف سنچری کی، ایک بہترین  آل راؤنڈر بنتا نظر آرہا ہے۔

انہوں نے مزید کہا کہ پی ایس ایل کے میچز دیکھتے ہوئے اب لگ نہیں رہا کہ کوئٹہ اور کراچی  کوالیفائی کر پائیں گی۔