ویب ڈیسک: نگران وزیر اعلیٰ پنجاب محسن نقوی نے گورنر ہاؤس کراچی میں گورنر سندھ کامران خان ٹیسوری سے ملاقات کی۔
ملاقات کے دوران ملک کی مجموعی سیاسی صورتحال، دونوں صوبوں کے درمیان تعاون بڑھانے، مختلف شعبوں میں وفود کے تبادلوں اور باہمی دلچسپی کے دیگر امور پر تبادلہ خیال کیا گیا، دونوں رہنماؤں نے سبی میں دہشت گردی کے واقعہ کی شدید مذمت کی۔
نگران وزیراعلیٰ پنجاب محسن نقوی نے کہاکہ قانون نافذ کرنے والے اداروں کی لازوال قربانیوں کو قدر کی نگاہ سے دیکھتے ہیں، وطن عزیز کے پائیدار امن کے لئے ہر ایک کو اپنا بھرپور کردار ادا کرنا ہے، بین الصوبائی ہم آہنگی کے فروغ کیلئے سب کو باہمی اختلافات بھلا کر ایک ہونا ہو گا۔
گورنر سندھ کامران خان ٹیسوری نے کہا کہ عوام متحد ہیں، دہشت گرد اپنے مذموم عزائم میں کبھی کامیاب نہیں ہوں گے، قوم قانون نافذ کرنے والے اداروں کی قربانیوں کو قدر کی نگاہ سے دیکھتی ہے۔
انہوں نے کہاکہ دونوں صوبوں کے درمیان تعاون میں اضافہ وقت کی ضرورت ہے، مختلف شعبوں میں وفود کے تبادلوں سے سندھ اور پنجاب دونوں کو فائدہ ہوگا۔