(اسرار خان)شہر میں پتنگ بازی پر قابو نہ پایا جا سکا ، ایک اور موٹر سائیکل سوار شہری ڈور کی زد میں آ کر زخمی ہو گیا ۔
ڈور پھرنے کا واقعہ کوٹ لکھپت کے علاقہ چند رائے روڈ پر پیش آیا، جہاں موٹر سائیکل سوار 22سالہ نصیر ڈور کی زد میں آ کر زخمی ہوگیا۔ پولیس کے مطابق نصیر کا بایاں کان بری طرح سے متاثر ہوا، جسے طبی امداد کے لئے جنرل ہسپتال منتقل کر دیا گیا۔ واقعہ منظر عام پر آیا تو ڈی آئی جی آپریشنز ڈاکٹر محمد عابد خان نے ایس پی ماڈل ٹاؤن سے رپورٹ طلب کرلی۔
ڈی آئی جی آپریشنز نے متعلقہ افسران کی سرزنش کرتے ہوئے ایس ایچ او کو چارج شیٹ کر دیا۔ ڈاکٹر محمد عابد خان کا کہنا تھا کہ پتنگ بازی کی روک تھام میں ناکام رہنے والے افسران کے خلاف سخت محکمانہ کارروائی کی جائے گی ۔