(مانیٹرنگ ڈیسک) وزیرِ اعظم عمران خان نے مستحق افراد کو کھانا فراہم کرنے کیلئے پیش کی گئی تجاویز کو سراہتے ہوئے زور دیا ہے کہ ایسے علاقوں کی نشاندہی کو ترجیحی بنیادوں پر یقینی بنایا جائے جہاں لوگ معاشی مشکلات کا شکار ہو کر دو وقت کی روٹی سے محروم ہیں، احساس ''کوئی بھوکا نہ سوئے پروگرام '' کامیابی کے بعد نہ صرف پاکستان بلکہ دنیا بھر میں اپنی مثال آپ ہوگا۔
بدھ کو وزیرِ اعظم عمران خان نے احساس، کوئی بھوکا نہ سوئے اقدامات پر بریفنگ اجلاس کی صدارت کی جس میں معاونِ خصوصی برائے تخفیفِ غربت و سماجی تحفظ ڈاکٹر ثانیہ نشتر نے وزیرِ اعظم کو منصوبے پر تفصیلی بریفنگ دی جس کے ذریعے انفرادی اور اداروں کی سطح پر مرضی کے مطابق ڈونیشن دینے کے ساتھ ساتھ اس کے خرچ کی تفصیل خودکار اور ڈیجیٹل طریقے سے ڈونر تک جا سکے گی۔
وزیرِ اعظم کے ویژن کے مطابق احساس کے ذریعے غزائی قلت کے خطرے سے دوچار علاقوں کی نشاندہی کر کے منظم حکمتِ عملی سے کھانے کی فراہمی کو یقینی بنایا جائے گا، اس نظام کی مکمل تیاری کے بعد اس کا آغاز رواں سال کی پہلی سہ ماہی کے اختتام تک کر دیا جائے گا۔
وزیرِ اعظم نے مستحق افراد کو کھانا فراہم کرنے کیلئے پیش کی گئی تجاویز کو سراہتے ہوئے اس بات پر زور دیا کہ ایسے علاقوں کی نشاندہی کو ترجیحی بنیادوں پر یقینی بنایا جائے، جہاں لوگ معاشی مشکلات کا شکار ہو کر دو وقت کی روٹی سے محروم ہیں۔
انہوں نے کہا کہ جامع منصوبہ بندی سے ایسا نظام لایا جائے، جس سے مستحقین تک رسائی براہ راست اور آسان ہو، احساس کوئی بھوکا نہ سوئے پروگرام کامیابی کے بعد نہ صرف پاکستان بلکہ دنیا بھر میں اپنی مثال آپ ہوگا۔