سٹی 42 :محکمہ موسمیات نے کہا ہے کہ ملک کے بیشتر علاقوں میں موسم سرد اور خشک جبکہ بالائی علاقوں اور شمالی بلوچستان میں شدید سرد رہے گا، تاہم بالائی خیبر پختونخوا ، گلگت بلتستان ، کشمیر ، بالائی پنجاب،پوٹھوہار اور اسلام آبادمیں مطلع جزوی ابر آلود رہنے کے علاوہ تیز ہواؤں اور گرج چمک کےساتھ ہلکی سے درمیانی بارش اور پہاڑوں پر برفباری کی توقع ہے، اس دوران چند مقامات پر ژالہ باری کا بھی امکان ہے ۔

اتوار کے روز موسم کی صورتحال کے متعلق محکمہ موسمیات کا کہنا ہے کہ اسلام آباد اور گردونواح میں تیز ہواؤں اور گرج چمک کےساتھ بارش کا امکان ہے۔ خیبرپختونخوا کے بیشتر اضلاح چترال، دیر، سوات، مالاکنڈ، بونیر، شانگلہ، مانسہرہ، بٹگرام، کوہستان ، ایبٹ آباد،پشاور، صوابی،مردان،نوشہرہ،باجوڑ،مہمند، خیبر ،اورکزئی اور کرم میں بارش جبکہ پہاڑوں پر برف باری کی توقع ہے، جبکہ دیگر علاقوں میں موسم سرد اور مطلع جزوی ابر آلود رہے گا۔

پنجاب کے بیشتر علاقوں راولپنڈی، اٹک، جہلم، چکوال، سیالکوٹ، نارووال، حافظ آباد، گوجرانوالہ، منڈی بہا ولدین ، گجرات، لاہور، قصور،شیخوپورہ، سرگودھا،بھکر ،میانوالی ، خوشاب، فیصل آباد اور جھنگ میں مطلع ابر آلود رہنے کے علاوہ  گرج چمک کےساتھ ہلکی سے درمیانی بارش کا امکان ہے، جبکہ مری، گلیات اور گر دو نواح میں ہلکی سے درمیانی بارش اور برفباری کی توقع ہے، اس کے علاوہ صوبہ کے دیگر اضلاع میں موسم سرد اور خشک رہے گا۔

محکمہ موسمیات کا کہنا ہے کہ بلوچستان کے بیشتر اضلاع میں موسم سرد اور خشک جبکہ شمالی اضلاع میں شدید سرد رہے گا۔ سندھ کے بیشتر اضلاع میں موسم سرد اورخشک رہنے کا امکان ہے، جبکہ سکھر، کشمور، جیکب آباد اور گر دو نواح میں بعض مقامات پر صبح کے اوقات میں ہلکی دُھندچھائے رہنے کی توقع ہے۔ اس کے علاوہ کشمیر اور  گلگت بلتستان میں موسم شدید سرد اور مطلع ابر آلود رہنے کے ساتھ بارش جبکہ پہاڑوں پر برف باری کا امکان ہے ۔