سٹی 42 : چئیرمین پی سی بی محسن نقوی نے قذافی سٹیڈیم کے نواں میں واقع ایل سی سی اے گراؤنڈ میں نئے پویلین کا افتتاح کردیا ۔
چئیرمین پی سی بی نے نئے پویلین کا افتتاح کرنے کے بعد میڈیا سے گفتگو میں کہا کہ ملک میں تمام گراؤنڈز کی حالت جلد بہتر ہوجائے گی, پاکستان میں جہاں گراؤنڈز نہیں ہیں وہاں زمین خریدی جائے گی، جو میدان پہلے سے موجود ہیں ان کی حالت بہتر کرنی ہے، ہر شہر میں گراؤنڈز کو فعال کرنے پر ہماری توجہ مرکوز ہے۔انہوں نے کہا کہ ڈومیسٹک لیول پر ہر چیز کو بہتر کرنا ہے تا کہ ہمارے پاس اچھے کھلاڑی آئیں، ہماری خواہش ہے کہ پشاور کا اسٹیڈیم تیار ہوجائے اور دیگر میدانوں کی تزین و آرائش کا کام بھی مکمل ہو۔
چیمپئنز ٹرافی2025 کے حوالے سے محسن نقوی نے کہا کہ ہم قوم کو مایوس نہیں کریں گے، سب بہتر ہوگا، آنے والے دنوں میں قوم کی توقعات سے بڑھ کر چیزیں ملیں گی۔
محسن نقوی نے کہا کہ آج آئی سی سی کی میٹنگ تھی لیکن ملتوی ہو گئی، میں ابھی کسی شرط پر بات نہیں کروں گا، ابھی آئی سی سی سے بات چل رہی ہے۔ انہوں نے کہا کہ اگر آئی سی سی پروگریس کرئے گی تو دنیا کی کرکٹ پروگریس کرئے گی۔