راؤ دلشاد: پنجاب حکومت نے مختلف شہروں کے لئے 1500الیکٹرک بسیں چلانے کے پراجیکٹ کی اصولی منظوری دی۔
تٍفصیلات کے مطابق وزیراعلیٰ مریم نوازشریف کی زیر صدارت ٹرانسپورٹ ڈیپارٹمنٹ کا خصوصی اجلاس منعقد ہوا، جس میں پہلے مرحلے میں 380الیکٹرک بسوں کی خریداری کا عمل جلد از جلد مکمل کرنے کا حکم دیا گیا۔
بڑے شہروں میں مرحلہ وار الیکٹرک بسوں پر مشتمل ٹرانسپورٹ سسٹم شروع کیا جائے گا، پہلے مرحلے میں لاہور اور گوجرانوالہ میں الیکٹرک بسیں چلائی جائیں گی،جس کے بعدسرگودھا،شیخوپورہ، سیالکوٹ، گجرات سمیت چھ اضلاع میں نئے ٹرانسپورٹ سسٹم پر اتفاق کیا جائے گا،وزیر اعلیٰ نے لاہور، گوجرانوالہ الیکٹرک بس سروس کے لئے اگلے جون تک کی ڈیڈلائن مقرر کر دی۔
فیصل آباد میں اورنج اور ریڈ بس سروس شروع کی جائے گی،سمندری روڈ تا سرگودھا روڈ ریڈ بس سروس اور جڑانوالہ تا جھنگ روڈ اورنج بس سروس ہوگی،مریم نواز شریف نے فیصل آباد اور گوجرانوالہ میں الیکٹرک بس کے ٹریک کے لئے پلان طلب کر لیا۔
لاہور میں یلیو لائن الیکٹرک بس کے ٹریک کی پلاننگ کے لئے 15روز کی مہلت دی گئی،وزیراعلیٰ نے الیکٹرک بسوں کے چارجنگ سٹیشن قائم کرنے کا پلان بھی طلب کر لیا،وزیراعلیٰ نے لاہور میں جدید ترین ٹرانسپورٹ ٹاور کمانڈ اینڈ کنٹرول سنٹر کی منظوری بھی دی۔
مریم نوازشریف نے کہا کہ خواہش ہے کہ ہر بڑے شہر میں شاندار اور جدید ترین بس سسٹم موجود ہو۔