ویب ڈیسک:ڈونلڈ ٹرمپ کی ایک بار پھر وائٹ ہاوس واپسی، ڈونلڈ ٹرمپ نے امریکی صدارتی الیکشن جیت لیا، ٹرمپ نے مطلوبہ 277 الیکٹورل ووٹ حاصل کرلئے۔
تفصیلات کےمطابق دنیا کے طاقتور ترین صدر کی دوڑ ٹرمپ نے جیت لی، ڈونلڈ ٹرمپ دوسری مرتبہ امریکہ کے صدر بن گئے، ٹرمپ امریکا کے 47 ویں صدر منتخب ہوئے، امریکی صدر بننے کے لئے 270 ووٹ درکار تھے ٹرمپ نے277 الیکٹورل ووٹ حاصل کئے۔
ذرائع ابلاغ کے مطابق امریکی صدر کے انتخاب کیلئے تمام 50 ریاستوں میں ہونے والی پولنگ کے نتائج کے مطابق ڈونلڈ ٹرمپ نے انتخابی معرکہ جیت لیا ہے۔
امریکی صدارتی انتخاب میں538 میں سے اب تک ڈونلڈ ٹرمپ نے 277 اور کملا ہیرس نے 226 الیکٹورل ووٹ حاصل کیے ہیں۔
اب تک کے نتائج کے مطابق ایوان نمائندگان میں ری پبلکن 188 اور ڈیموکریٹس 160 نشستوں پر کامیاب ہوچکے ہیں، امریکا کی 50 میں سے 27 ریاستوں میں ڈونلڈ ٹرمپ کامیاب ہو گئے ہیں جبکہ 19 میں کملا ہیرس کو کامیابی ملی ہے۔
سینیٹ میں ری پبلکن نے 51 نشستوں کے ساتھ اکثریت حاصل کر لی ہے جبکہ ڈیموکریٹس نے ایوان بالا کی 43 نشستیں جیت لی ہیں۔
امریکی میڈیا کے مطابق ٹرمپ پہلی بار 2016 میں 6 کروڑ 29 لاکھ سے زائد ووٹ لیکر کامیاب ہوئے تھے، 2016 میں مکمل الیکٹورل کالج سے 306 ووٹ حاصل کئے تھے۔