ملتان روڈ پر خوفناک حادثہ؛ چھ سالہ بچہ سمیت دو افراد جاں بحق

(فہد علی)ملتان روڈ شاہ پور کانجراں کے علاقے میں روڈ پر کھڑے کنٹینر سے موٹر سائیکل ٹکرا گئی، حادثے میں چھ سالہ بچہ سمیت دو افراد جاں بحق، دو زخمی،پولیس نے کاغذی کارروائی کے بعد لاشیں ورثا کے حوالے کردیں۔
 شاہ پور کانجراں ملتان روڈ کے علاقے میں موٹر سائیکل پر دو بچوں سمیت چار افراد سوار ہو کر جارہے تھے کہ مین روڈ پر کھڑے کنٹینر سے موٹر سائیکل ٹکرا گئی جس کے باعث چھ سالہ شعیب اور 42 سالہ اصغر جاں بحق ہو گئے۔ حادثے میں دو سالہ مریم اور چودہ سالہ غلام عباس زخمی ہوئے ۔

 پولیس اور ریسکیو نے موقع پر پہنچ کر زخمیوں کو ہسپتال منتقل کیا۔ ورثا کی جانب سے کاروائی نہ کروانے پرپولیس نے جاں بحق ہونے والوں کی لاشیں کاغذی کاروائی کے بعد ورثا کے حوالے کردیں۔

واضح رہے کہ گزشتہ روز برکی کے علاقے میں ٹریکٹر ٹرالی نے موٹر سائیکل سواروں کو کچلا،حادثے میں موٹرسائیکل سوار دو نوجوان جاں بحق اور ایک زخمی ہو گیا،برکی کے علاقے بھڑتھ پل کے قریب موٹر سائیکل سوار 3 لڑکے جا رہے تھے کہ تیز رفتار ٹریکٹر ٹرالی کی ٹکر سے14 سالہ محمد احسن اور 12 سالہ محسن موقع پر ہی جاں بحق ہوگئے اور 40 سالہ ریاض کو شدید زخمی حالت میں ہسپتال منتقل کر دیا گیا۔

پولیس کا کہنا ہے کہ ڈرائیور موقع سے فرار ہو گیا جبکہ ٹریکٹر ٹرالی قبضہ میں لے لی اور لاشیں مردہ خانے جمع کروا کے قانونی کارروائی کی جا رہی ہے ۔