سٹی42: سیکٹر 10 نارتھ کراچی میں خاتون کو ہراساں کرنے کا ایک اور واقعہ سامنے آگیا ،پولیس نے ملزم کو گرفتار کرلیا۔
ایس ایس پی سینٹرل کے مطابق کراچی میں سر سید تھانے کی حدود میں گلی میں جاتی خاتون کو ہراساں کرنے والے ملزم کو گرفتار کرلیا گیا ہے۔
گذشتہ روز خاتون کو ہراساں کرنے کی سی سی ٹی سی فوٹیج سامنے آئی تھی جس کے مطابق ملزم نے موٹر سائیکل پر جاتے ہوئے راہ چلتی خاتون کو سیکٹر 10 نارتھ کراچی میں ہراساں کیا اور پھر فرار ہوگیا تھا۔
ایس ایس پی ڈسٹرکٹ سینٹرل نے وائرل ویڈیو میں نظر آنے والے ملزم کی فوری گرفتاری کے سخت احکامات دیے گئے جس پر کارروائی کرتے ہوئے پولیس نے ملزم کو سرسید کی حدود سے گرفتار کر لیا۔
ایس ایس پی سینٹرل کا کہنا ہے کہ ملزم کی شناخت گوہر ولد عتیق الرحمن کے نام سے ہوئی ہے، ملزم نے انٹیروگیشن میں بتایا کہ خواتیں کو متعدد بار ہراساں کرچکا ہے۔