سٹی42: پاکستان کرکٹ بورڈ کی مینجمنٹ کمیٹی کے نئے چیئرمین ذکاء اشرف نے عہدہ سنبھال لیا۔ دفتر آمد پر سارے اسٹاف نے ذکا اشرف کا استقبال کیا۔ دوسری جانب نئے سیٹ اپ آتے ہی چیف سلیکٹر ہارون رشید عہدوں سے فارغ ہوگئے۔
گذشتہ رات نوٹیفکیشن کے بعد ذکا اشرف کی بطور چیئرمین منیجمنٹ کمیٹی پی سی بی میں انٹری ہوئی تو سی او سلمان نصیر سمیت افسران نے انہیں خوش آمدید کہا۔
نئی دس رکنی منیجمنٹ کمیٹی کا آج اہم اجلاس بھی ہو چکا ہے جس میں ڈومیسٹک کرکٹ، کرکٹ انفراسٹرکچر، دیگر انتظامی امور کے علاوہ دورہ سری لنکا، ایشیا کپ اور ورلڈکپ پر غور کیا گیا۔
اس کے ساتھ ساتھ آئی سی سی بورڈ میٹنگ میں شرکت کے حوالے سے فیصلے کیے گئے۔ دوسری جانب کرکٹ بورڈ میں نئی انتظامیہ کے آتے ہی اکھاڑ پچھاڑ شروع ہو گئی۔
نجم سیٹھی کے انتہائی قریبی ساتھی سابق ممبر منیجمنٹ کمیٹی ہارون رشید کو چیف سلیکٹر کے عہدے سے بھی ہاتھ دھونا پڑ گئے۔