سٹی42:  کسی عزیز کی سالگرہ کے روز اسی عزیز  کی وفات کی خبر مل جائے تو یقیناً یہ ایک اذیت ناک تجربہ ہو گا، ایسا تجربہ لاکھوں دلوں کی دھڑکن ایک اداکارہ کے مداحوں کو اس وقت ہوا جب انہیں اپنی فیوریت اداکارہ کی سالگرہ کے روز ان کی وفات کی اطلاع ملی۔

 اخبار اور نیوز چینل کوئی فیک نیوز شائع کر دیں تو جس کو اس فیک نیوز سے جتنا نقصان پہنچتا ہے وہ اتنی ہی سخت قانونی کارروائی کر کے اخبار اور نیوز چینل کو زرِ تلافی  ادا کرنے اور معافی  مانگنے پر مجبور کر سکتا ہے، اس کے باوجود بہت سی فیک نیوز سے ہونے والے نقصان کی تلافی کبھی نہیں ہوتی، خصوصاً اذیت کی تلافی کبھی ممکن نہیں ہوتی۔ ایسی فیک نیوز اگر نام نہاد سوشل میڈیا کے ذریعہ پھیلائی جائے تو متاثر ہونے والے فیک نیوز پھیلانے والے کا عملاً کچھ نہیں بگاڑ سکتے کیونکہ اس کا تو مفت میں بنایا ہوا ایک "سوشل پلیٹ فارم کا اکاؤنٹ" ہی داؤ پر لگا ہوتا ہے، جسے پلیٹ فارم بند کر دے تو وہی شخص کسی فرضی نام سے دوسرا اکاؤنٹ بنا لیتا ہے۔حال ہی میں فیک نیوز سے جنم لینے والی اذیت ناک صورتحال کا سامنا لاکھوں لوگوں کی پسندیدہ اداکارہ نورا فتیحی اور ان کے مداحوں  کو کرنا پڑا ہے جب  نورا  کی سال گرہ سے ایک روز پہلے مداحوں پر یہ "اطلاع"  بجلی بن کر گری کہ ان کی محبوب اداکارہ تو انتقال کر گئی ہیں۔

نورا فتیحی کی موت کی جھوٹی خبروں نے سوشل میڈیا کو ہلا کر رکھ دیا، لیکن کچھ دیر بعد یہ سامنے آ گیا کہ اصل ماجرا کیا تھا۔ 
 
سوشل پلیٹ فارم پر ایک ویڈیو کلپ اچانک وائرل ہو  گئی کیونکہ اس ویڈیو کلپ کے کیپشن میں لکھا تھا کہ بالی وڈ کی مشہور اداکار نورا فتیحی کی موت بالی وڈ کے لیے بری خبر ہے__فوٹو: فائل
بالی وڈ کی معروف ڈانسنگ گرل اور مراکش سے تعلق رکھنے والی اداکار نورا فتیحی اپنی سالگرہ سے ایک دن قبل ایک عجیب و غریب جھوٹی خبر کا شکار بن گئیں۔

بھارتی میڈیا  مین شائع ہونے والی رپورٹ کے مطابق اپنے مخصوص ڈانس کے اسٹیپس سے اسٹیج میں جان پھونکنے والی نورا فتیحی سے متعلق جھوٹی خبریں جنگل کی آگ کی طرح پھیلیں کہ وہ ایک حادثے کا شکار ہوکر دنیا سے رخصت ہوگئی ہیں۔

اس اذیت ناک افواہ کا باعث بننے والی  گمراہ کن ویڈیو میں ایک خاتون کو پہاڑ کی بلندی سے نیچے گرتے ہوئے دیکھا گیا۔  بھارت مین اور بھارت سے باہر نورا فتیحی کے مداحوں کو اس فیک نیوز سے گہرا صدمہ ہوا جس کا اظہار بعض نے سوشل پلیٹ فارمز پر رو دھو کر کیا، بعض ان پلیٹ فارمز سے باہر کی زندگی مین بھی دن بھر اداس رہے۔

گو کہ کچھ ہی دیر بعد یہ سچ سامنے آ گیا کہ نورا فتیحی بخیریت ہیں، انہیں کوئی حادثہ پیش نہیں آیا اور ان کے کسی پہاڑی سے گرنے کی فیک نیوز  میں کوئی صداقت نہیں۔بھارتی اخبارات اور نیوز چینلز نے نورا کے زندہ سلامت ہونے کی تصدیق کی۔

لیکن ڈیمیج تو بہرحال ہو چکا تھا۔ سوشل پلیٹ فارمز پر ڈیپینڈ کرنے والے بہت سے لوگ اخبار اور ٹی وی تو دیکھتے ہی نہیں۔ ایسا بھی ہوتا ہے کہ فیک نیوز تو وائرل ہو کر ہر ایک کی ٹائم لائن پر پہنچ جاتی ہے لیکن اس فیک نیوز کو جھٹلانے والا سچ اتنی سرعت سے وائرل نہیں ہوتا۔

نورا فتیحی کو مر چکی قرار دینے والی  ویڈیو کو جعلی قرار دیا گیا ہے، اس ویڈیو کلپ کو کسی کم ظرف نے  بظاہر عوام کو گمراہ کرنے اور غیر ضروری خوف و ہراس پھیلانے کے لیے بنایا  اور مِس لیڈنگ کیپشن کے ساتھ استعمال کیا۔ 

سوشل میڈیا صارفین کی جانب سے نورا سے متعلق جھوٹی اور غلط خبریں پھیلانے والوں پر سخت تنقید کی گئی ہے۔یہ پہلا موقع نہیں جب کسی اسٹار کی موت سے متعلق جھوٹی خبر سوشل میڈیا کی زینت بنی ہو۔

پاکستان میں اب ایسی جھوٹی خبریں جنہیں اصطلاح میں "فیک نیوز" کہا جاتا ہے پھیلانے پر سخت سزاؤں کا قانون پیکا ایکٹ نافذ ہو چکا ہے جس کے بعد روایتی نیوز میڈیا کے ساتھ  سوشل میڈیا پر  بھی فیک نیوز پھیلانے والوں کی دی ہوئی اذیت کی تلافی تو شاید ممکن نہ ہو لیکن خود انہیں بھی جیل کی سزا اور جرمانوں کی شکل میں کافی اذیت بھگتنا پڑے گی۔