راؤ دلشاد:  پنجاب میں ایک لاکھ صارفین کیلئے فری سولر پینل سکیم کا آغاز، وزیراعلیٰ مریم نواز نے افتتاح کر دیا.

وزیراعلیٰ پنجاب مریم نواز نے سی ایم پنجاب فری سولر پینل سکیم کا باقاعدہ افتتاح کر دیا ہے، جس کا مقصد عوام کو مہنگی بجلی سے مستقل ریلیف فراہم کرنا ہے۔ سکیم کے تحت صوبے میں ایک لاکھ سولر سسٹم نصب کیے جائیں گے، جن سے پنجاب کے صارفین مستفید ہوں گے۔

وزیراعلیٰ مریم نواز نے اس موقع پر کہا کہ "اس سکیم کا مقصد عوام کو بجلی کے بلوں سے نجات دلانا اور انہیں مستقل توانائی کے ذرائع فراہم کرنا ہے۔" انہوں نے مزید کہا کہ "عوام کے وسائل عوام کی سہولت اور ریلیف کے لیے خرچ ہوں گے۔"

صوبے کے سیکرٹری انرجی نے سکیم کے بارے میں بریفنگ دیتے ہوئے بتایا کہ اس سکیم کے تحت ماہانہ 200 یونٹ تک بجلی استعمال کرنے والے صارفین کو سولر سسٹم مفت فراہم کیے جائیں گے۔ انہوں نے کہا کہ "100 یونٹ ماہانہ استعمال کرنے والے 52,019 صارفین کو 550 واٹ کا مفت سولر سسٹم دیا جائے گا۔"

مریم نواز نے اس بات پر بھی زور دیا کہ فری سولر پینل سکیم سے وفاقی حکومت پر سبسڈی کا بوجھ بھی کم ہو گا، کیونکہ یہ اقدام توانائی کے متبادل ذرائع کی طرف قدم بڑھائے گا۔ صارفین آج سے ہی اس سکیم کے لیے ایس ایم ایس یا آن لائن پورٹل کے ذریعے درخواست دے سکتے ہیں۔

فری سولر پینل سکیم کے تحت صوبے بھر میں ایک لاکھ سولر سسٹمز فراہم کیے جائیں گے، جس سے عوام کو نہ صرف توانائی کے بلوں میں کمی آئے گی بلکہ توانائی کے دیرپا حل کی طرف بھی قدم بڑھایا جائے گا۔