ویب ڈیسک : وزیراعظم شہباز شریف نے کہا ہے کہ آج کے دن ہم ان لوگوں کو خراج تحسین پیش کرتے ہیں جنہوں نے پاکستان کے مستقبل کی تشکیل اورعلم کو فروغ دینے کے عظیم مشن کو سرانجام دینے کا بیڑہ اٹھایا ہے۔
وزیراعظم نے عالمی یوم اساتذہ پر پیغام دیتے ہوئے کہا کہ آج ہم اپنی قوم کے مستقبل کے معمار کے طور پر اساتذہ کے گراں قدر کردار کو تسلیم کرنے کے لیے عالمی یوم اساتذہ منانے میں عالمی برادری کے ساتھ شریک ہیں۔ درحقیقت کسی ملک کی ترقی بنیادی طور پر اس کے افراد کی تعلیم سے جڑی ہوتی ہے اور یہ اساتذہ کی انتھک محنت ہی ہے جو نوجوان نسل میں ترقی اور خوشحالی کی تحریک اور لگن پیدا کرتی ہے۔
شہبازشریف نے کہا کہ میں پاکستان بھر کے تمام اساتذہ کا دل کی گہرائیوں سے شکریہ ادا کرتا ہوں جو اپنے غیر متزلزل عزم کے ساتھ نوجوان ذہنوں کو سنوارتے ہیں،وہ ہمارے مستقبل کے معمار ہیں اور علم پر مبنی معیشت بننے کے ہمارے مقصد کے لیے ان کی لگن ناگزیر ہے۔ ان کی کاوشوں کے بغیر ہم اپنی ان امنگوں کو پورا نہیں کرسکتے جو ہم نے بحیثیت قوم اپنے لیے متعین کر رکھی ہیں۔
انہوں نے کہا کہ حکومت پاکستان اساتذہ کے ساتھ کئے گئے اپنے وعدے کی تکمیل کے لیے پرعزم ہے،ہم ایک حوصلہ افزا اور اچھی معاون تدریسی افرادی قوت کی اہمیت کو تسلیم کرتے ہیں اور جدید انفراسٹرکچر اور تعلیمی وسائل میں سرمایہ کاری جاری رکھیں گے۔ ہمارا مقصد ایک اعلیٰ کارکردگی کا حامل تعلیمی نظام وضع کرنا ہے جو ہمارے طلباء اور اساتذہ دونوں کو تیزی سے بدلتی ہوئی دنیا میں ترقی کی منازل طے کرنے کے قابل بنا سکے۔
وزیراعظم نے کہا کہ آئیے ہم آج اور ہر آنے والے دن کو اپنے اساتذہ کے انتہائی اثرانگیز کردار کے طور پر منائیں اور پاکستان کے مستقبل کے رہنماؤں کو تعلیم کے زیور سے آراستہ کرنے اور ان کی حوصلہ افزائی کرنے کے مشن میں ان کی معاونت کرنے کے اپنے عزم کا اعادہ کریں۔
یاد رہے کہ آج پاکستان سمیت دنیا بھر میں اساتذہ کا عالمی دن آج منایا جارہا ہے ۔