زاہد اقبال رانا : گوجرانوالہ کے مختلف علاقوں اور قلعہ دیدار سنگھ میں تیز آندھی کے باعث 4 افراد جاں بحق، 4 زخمی ہوگئے ۔
گوجرانوالہ شہر اور گردونواح میں تیز آندھی کے ساتھ بارش شروع ہوگئی۔ریسکیو حکام کے مطابق تیز آندھی کے باعث شہر کے مختلف علاقوں میں دیواریں اور کھڑکی گرنے کے واقعات سامنے آئے ہیں ۔
ریسکیو حکام کا کہنا ہے کہ مختلف علاقوں میں دیواریں گرنے سے ایک شخص جاں بحق ہوگیا ، جبکہ 3 افراد زخمی ہو ئے ہیں۔ لاش اور زخمیوں کو اسپتال منتقل کر دیا گیا ہے۔
ریسکیو حکام کے مطابق گوجرانوالہ کے علاقے چک خلیل میں چھت گرنے سے 12 سالہ بچی جاں بحق ، جبکہ اس کی بہن زخمی ہو گئی۔ دوسری جانب کوٹ دیس راجہ میں تالاب کنارے ماں کے ساتھ چلتا بچہ تیز ہوا کے باعث تالاب میں گر گیا، تالاب میں گرنے سے 8 سالہ بچہ جاں بحق ہوگیا۔
ریسکیو حکام کا کہنا ہے کہ لاشوں اور زخمی کو ہسپتال منتقل کر دیا گیا ۔ بارش اور آندھی کے باعث ہلاکتوں کی تعداد 3 ہو گئی۔
دوسری جانب قلعہ دیدار سنگھ میں تیز آندھی کے باعث دیوار گرنے سے 2 بچوں کی ماں جاں بحق ہوگئی ۔ واقعہ تھانہ قلعہ دیدار سنگھ کے علاقہ محلہ جعفریہ میں پیش آیا ، جہاں 22 سالہ ارسہ بتول گھر کے صحن میں کھڑی تھی، اسی دوران تیز آندھی چلنے سے چھت کی دیوار اوپر آ گری۔ واقعے کے فوری بعد ارسہ بتول کو رورل ہیلتھ سنٹر منتقل کیا گیا لیکن وہ جانبر نہ ہوسکی ۔