کرول گھاٹی : کیمیکل فیکٹریوں میں لگنے والی آگ پر قابو پالیا گیا

فاران یامین : رنگ روڈ کے قریب کرول گھاٹی میں فیکٹریوں میں آگ لگنے کا واقعہ ،کیمیکل فیکٹریوں میں لگی آگ پر 9گھنٹے بعد قابو پالیا گیا ۔
آگ 6کنال پر مشتمل کیمیکل کی 4 فیکٹریوں میں لگی ، آگ سب سے پہلے ڈھائی کنال رقبہ پر مشتمل فیکٹری میں لگی ۔فیکٹری میں کیمیکل ڈرم پھٹنے سے آگ باقی 3فیکٹریوں تک پھیل گئی جس کی وجہ سے  3فیکٹریوں کا تمام سامان جل کر خاکستر ہو گیا ۔تنگ اور تاریک راستہ ہونےکے باعث  ریسکیو کو مشکلات کا سامنا کرنا پڑا،ریسکیو کی گاڑیوں کو پانی کے حصول میں بھی مشکلات کا سامنا رہا۔

آگ بجھانے میں ریسکیو کی 13گاڑیوں اور 50اہلکاروں نے حصہ لیا ۔رات بھر ریسکیو آپریشن جاری رہا ،پی ایچ اے، واسا کا عملہ اور  ضلعی انتظامیہ ، ڈی سی ساری رات جائے وقوعہ پر نہ پہنچے ۔
ریسکیو ایمرجنسی آفیسر کی جانب سے کہا گیا ہے کہ کولنگ کے عمل کے دوران وقفے وقفے سے آگ بھڑک رہی تھی ،فیکٹریوں میں فائر فائٹنگ کا کوئی سامان موجود نہیں تھا،ریسکیو کی گاڑیوں کو پانی بھرنے کیلئے 8سے10کلو میٹر دور جانا پڑا ۔