سٹی42: لاہور  میں کرول گھاٹی کے نزدیک فیکٹری میں آگ لگ گئی، آتشزدگی سے فیکٹری میں رکھ ہوئے شدید آتش گیر مادے  تھِنر اور کیمیکل کے ڈرم پھٹنے کے بعد  آگ  بہت اونچے شعلے بلند ہونے لگے جو تھوڑی ہی دیر میں آسمان سے باتیں کرنے لگے۔

ریسکیو  ون ون ٹو ٹو کے اہلکاروں نے بتایا کہ  لاہور میں رنگ روڈ کے قریب کرول گھاٹی  کے علاقہ میں واقع   پینٹ بنانے والی فیکٹری میں رات گئے آگ بھڑک اٹھی جس نے دیکھتے ہی دیکھتے پوری فیکٹری کو اپنی لپیٹ میں لے لیا۔  ریسکیو 1122 کی 12 گاڑیاں آگ بجھانے  میں مصروف ہیں۔

ریسکیو کے مطابق رنگ روڈ کے قریب پینٹ فیکٹری میں آگ رات ساڑھے 10 بجے لگی جس کی وجہ کا تعین نہیں ہوسکا۔

 6 کنال پر قائم پینٹ فیکٹری میں آگ کے شعلے آسمان سے باتیں کر رہے ہیں۔  کیمیکل کے ڈرم تھوڑی تھوڑی دیر بعد  دھماکوں سے پھٹ رہے ہیں جس سےعلاقے میں خوف و ہراس پیدا ہو گیا۔

ریسکیو  اہلکاروں کا کہنا ہے کہ اس حادثہ میں اب تک  کسی جانی نقصان کی اطلاع نہیں ملی۔ خوش قسمتی سے آبادی اس فیکٹری سے ہٹ کر واقع ہے۔

اہل علاقہ کے مطابق آگ سے متاثرہ فیکٹری میں تیار ہونے والا کیمیکل مقامی فیکٹریوں کو بھی سپلائی کیا جاتا تھا۔