میرا کیلئے نئی مصیبت، اداکارہ نے ایف آئی اے میں درخواست دے دی

علی اکبر: اسکینڈل کوئین اداکارہ میرا کی مشکلات کم نہ ہوسکیں، فلم سٹار میرا کے فیس بک، ٹویٹر اور انسٹاگرام اکاؤنٹس ہیک ہوگئے۔ فلم سٹار میرا نے ایف آئی اے سائبر کرائم ونگ کو درخواست دے دی۔

اداکارہ میرا نے ایف آئی اے سائبر کرائم کو دی جانے والی درخواست میں موقف اختیار کیا ہے کہ سابقہ مینجر نے اس کے سوشل میڈیا اکاونٹس ہیک کرلئے ہیں۔ اپنے فیس بک انسٹاگرام اور ٹویٹر اکاؤنٹس کا کنٹرول اب اس کے پاس نہیں ہے۔ اداکارہ کا کہنا ہے کہ سوشل میڈیا اکاؤنٹس ہیک ہونے سے ہزاروں فالور اور چاہنے والوں سے رابطہ نہیں ہو رہا۔

ایف آئی اے سائبر ونگ نے فلم سٹار میرا کی درخواست پر انکوائری شروع کر دی ہے جبکہ ایف آئی اے نے فلم سٹار میرا سے ان کے ثبوت بھی مانگ لیے ہیں۔  

دوسری جانب عدالت نے آئندہ سماعت پر میرا سے مکان کی ملکیتی کاغذات سے متعلق دستاویزات طلب کر لی ہے۔ سول کورٹ میں جج عدنان نے ادکارہ میرا کیخلاف گھر کی ملکیت دعویٰ درخواست کے حوالے سے کیس کی سماعت کی۔ درخواست گزار تسلیم کوثر نے اداکارہ میرا کیخلاف دعویٰ کی درخواست دائر کر رکھی ہے۔ درخواست گزار خاتون کا کہنا ہے کہ میرا نے دھوکا دہی سے 1 کنال کا گھر اپنے نام کروایا، اداکارہ میرا گھر فروخت کرنا چاہتی ہے۔ استدعا ہے کہ عدالت اداکارہ میرا کو گھر فروخت کرنے سے روکنے کا حکم دے۔