پنجاب کے نگراں وزیراعلیٰ سید محسن رضا نقوی نے بہاولپورمیں بہاول وکٹوریہ ہسپتال کی نو تعمیر شدہ آؤٹ پیشنٹ ڈیپارٹمنٹ کا افتتاح کر دیا۔انہوں نے بہاول وکٹوریہ ہسپتال کے سرجیکل وارڈ 4 کا بھی افتتاح کیا۔
افتتاح کے بعد محسن نقوی نے نئی او پی ڈی کی تزئین و آرائش کا بھی جائزہ لیا۔
نئی او پی ڈی میں معلومات کی فراہمی کا ڈیسک، مریضوں کیلئےانتظار گاہ اور ٹی وی اسکرینز نصب کی گئی ہیں جبکہ داخلی راستے پر خصوصی مریضوں کے لئے افراد کیلئے خصوصی گزرگاہ بنائی گئی ہے۔
وکٹوریہ ہسپتال میں نئی او پی ڈی کا افتتاح کرنے کے بعد محسن نقوی نے کہا کہ سی اینڈ ڈبلیو ڈیپارٹمنٹ کی دن رات کی محنت کی وجہ سے یہ تعمیراتی پراجیکٹ مختصر مدت میں مکمل ہوا ۔ اس پر 2 ارب 10 کروڑ روپے لاگت آئی۔اسے اسکی اصل حالت میں بحال کرنابہت مشکل تھا ۔سی اینڈ ڈبلیو ڈیپارٹمنٹ نے اس کے لئے دن رات کام کیا ہے۔
محسن نقوی نے بتایا کہ بہاولپور شہر کو بھی کو سیف سٹی پراجیکٹ میں شامل کیا گیا ہے۔
کمشنر بہاولپور احتشام انور، ڈپٹی کمشنر ظہیر انور، سیکرٹری ہیلتھ علی جان، آئی جی پنجاب ڈاکٹر عثمان انور اور متعلقہ حکام بھی نگران وزیراعلیٰ کے ہمراہ موجود تھے۔