( فاران یامین، رضوان نقوی ) الخدمت فاؤنڈیشن کے زیر اہتمام اندرون شہر موچی گیٹ کے 150 ضرورت مند خاندانوں میں سبزیاں تقسیم کی گئیں۔

سبزیاں الخدمت کے رضا کاروں کی مدد سے ضرورت مند افراد کے گھروں تک پہنچائی گئیں۔ رضاکاروں کے مطابق روزانہ 150 خاندانوں میں سبزیاں تقسیم کی جاتی ہیں۔

ان خاندانوں کی پہلے رجسٹریشن کرکے گھر والوں کا ڈیٹا جمع کیا گیا۔ اس کے بعد سبزیاں پہنچانے کا کام شروع کیا۔ رضا کاروں کا کہنا ہے کہ سبزیاں پہنچانے کا یہ سلسلہ لاک ڈاؤن کے خاتمے تک جاری رہے گا۔

دوسری جانب سید ککو شاہ ہیلتھ فاؤنڈیشن کے زیر اہتمام ساندہ کے مستحق خاندانوں میں راشن تقسیم کیا گیا۔ شرجیل بٹ، ارسلان بٹ، اسد شاہ، صغیر عباس سمیت دیگر مخیر حضرات کے تعاون سے 6 سو مستحق خاندانوں میں راشن تقسیم کیا گیا۔

سید علی عمران زیدی نے کہا کہ موجودہ صورتحال میں مخیر حضرات کو دل کھول کر مستحقین کی مدد کرنی چاہیئے۔ انہوں نے کہا کہ یہ مشکل وقت ہے جلد گزر جائے گا۔