(حافظ شہباز علی) پی سی بی کاگراس روٹ کرکٹ کروائے بغیر انڈر 19 کرکٹ کروانےکا فیصلہ کرلیا،بورڈ نے چھ صوبائی ٹیموں کی تشکیل کے لئے ٹرائلز کے شیڈول کوحتمی شکل دے دی۔
جونئیر سلیکشن کمیٹی کے اراکین اور صوبائی انڈر 19 کوچز سلیکشن کمیٹی میں شامل ہوں گے،ملک بھر میں 11 سے 18 ستمبر تک انڈر 19 ٹرائلز کا انعقاد کیا جائے گا۔ 11 اور 12 ستمبر کو سدرن پنجاب کے ٹرائلز ملتان اسٹیڈیم میں ہوں گے، سلیم جعفر اور وجاہت اللہ واسطی کے ہمراہ کامران خان اور حافظ ماجد جہانگیر سلیکشن کمیٹی میں شامل ہوں گے۔
خیبر پختونخواہ کے ٹرائلز 11 اور 12 ستمبرکو ایبٹ آباد اسٹیڈیم میں ہوں گے۔ توفیق عمر اور ثنااللہ بلوچ ٹرائلز کی نگرانی کریں گے۔سینٹرل پنجاب کے ٹرائلز 14 اور 15 ستمبر کو ایل سی سی اے گراونڈ میں ہوں گے۔ سلیم جعفر ، وجاہت اللہ واسطی ، تنویر شوکت اور عرفان فاضل سلیکٹرز ہوں گے۔
ناردرن کے ٹرائلز 14 اور 15 ستمبر پنڈی اسٹیڈیم میں ہوں گے۔ توفیق عمر ،ثنااللہ بلوچ ، محمد بلال اور محمد صادق سلیکٹرز ہوں گے۔ بلوچستان کے ٹرائلز 18 اور 19 ستمبر کوبگٹی اسٹیڈیم کوئٹہ میں ہوں گے۔ سندھ کے ٹرائلز 17 اور 18 ستمبر کو نیشنل اسٹیڈیم کراچی میں ہوں گے۔2018 میں ڈسٹرکٹ انڈر 19 اور گذشتہ برس انڈر 16 کھیلنے والے کھلاڑی ٹرائلز کے اہل ہوں گے۔