ویب ڈیسک : کراچی کے علاقے ڈیفنس میں بینک کے لاکر سے شہری کا 10 کروڑ روپے مالیت کی جیولری اور دیگر سامان چوری کرلیا گیا۔

شہری نے 6 فروری کو لاکر استعمال کیا جب 19 فروری کو دوبارہ بینک پہنچا تو لاکر کا بکس ہی مکمل طور پر غائب تھا، واقعے کا مقدمہ درج کرلیا گیا ہے۔متاثرہ شہری نے بتایا کہ وہ جولائی 2010ء سے لاکر آپریٹ کررہا ہے اور اب تک مختلف وقتوں میں ڈائمنڈ سیٹ، گولڈ سیٹ، برانڈڈ گھڑیاں اور غیر ملکی کرنسی لاکر میں رکھتا رہا ہے۔آخری مرتبہ 6 فروری کو لاکر میں سامان رکھا تھا اس کے بعد جب 19 فروری کو پہنچے تو لاکر میں سامان سے بھرا بکس مکمل طور پر غائب تھا۔انہوں نے فوری طور پر بینک کے عملے کو آگاہ کیا جب تلاش شروع کی گئی تو زیورات کے خالی پاؤچز بینک کی چھت کی فالزسیلنگ سے ملے۔

 انہوں نے واقعے سے متعلق درخشاں تھانے میں ایف آئی آر درج کرادی ہے، اس کے ساتھ ایف آئی اے اور اسٹیٹ بینک کو بھی خط لکھ دیے ہیں۔ ایس ایس پی انویسٹی گیشن ساؤتھ علی حسن نے بتایا کہ متاثرہ شہری سے واقعے کی تمام تر تفصیلات حاصل کرلی گئی ہیں جبکہ بینک کے عملے سے بھی پوچھ گچھ کی جارہی ہے۔ تحقیقات کے دوران اگر ضرورت محسوس کی گئی تو ایف آئی آر میں مزید دفعات بھی شامل کی جائیں گی۔