ویب ڈیسک: علی امین گنڈاپور نے کہا کہ کرم امن معاہدے کے بعد سرکاری گاڑیوں کے قافلے پر فائرنگ انتہائی افسوسناک اور قابل مذمت ہے،انہوں نے واقعہ کی اعلیٰ حکام سے رپورٹ طلب کر لی۔
واقعہ کرم میں امن کے لئے حکومتی کوششوں کو سبوتاژ کرنے کی دانستہ اور مذموم لیکن ناکام کوشش ہے، فائرنگ میں ملوث عناصر کے خلاف قانون کے مطابق سخت کارروائی عمل میں لائی جائے گی۔
ان کا کہنا تھا کہ واقعہ ان عناصر کی کارستانی ہے جو کرم میں امن کی بحالی نہیں چاہتے، صوبائی حکومت کرم میں امن کی بحالی اور عوام کو درپیش مشکلات کو حل کرنے کیلئے پر عزم ہے۔
انہوں نے کہاکہ فریقین کے درمیان معاہدہ اس بات کا ثبوت ہے کہ کرم کے لوگ پرامن ہیں اور وہ علاقے میں امن چاہتے ہیں، کچھ شرپسند عناصر کرم میں امن کی بحالی نہیں چاہتے، ان عناصر کی کوشیں کامیاب نہیں ہوں گی، صوبائی حکومت اور علاقے کے لوگ مل کر ایسے شرپسند عناصر کی مذموم کوششوں کو ناکام بنائیں گے۔
وزیراعلیٰ خیبرپختونخوا کا کہنا تھا کہ علاقے کے لوگ ان عناصر کی نشاندہی اور انہیں کیفر کردار تک پہنچانے میں حکومت اور انتظامیہ کے ساتھ تعاون کریں۔
علی امین گنڈاپور نے مزید کہا کہ اس افسوسناک واقعے سے کرم میں امن کی بحالی کے لئے حکومت اور علاقہ عمائدین کی کوششیں متاثر نہیں ہوں گی، صوبائی حکومت علاقہ عمائدین کے تعاون سے علاقے میں مکمل امن کی بحالی تک کوششیں جاری رکھے گی۔
خیال رہے کہ پشاور میں لوئر کرم کے علاقے بگن میں سرکاری گاڑیوں پر نامعلوم افراد کی جانب سے فائرنگ کی گئی ہے جس میں ڈپٹی کمشنر کرم جاوید اللہ محسود سمیت پانچ افراد زخمی ہوئے ہیں۔