امریکہ کے صدر جو بائیڈن کی جانب وائٹ ہاؤس میں مسلمان کمیونٹی کے سرکردہ افراد کے لئے خصوصی افطار ڈنر اس وقت منسوخ کرنا پڑ گیا جب مسلمانوں نے اس تقریب کا بائیکاٹ کر دیا۔
عرب ٹی وی کے مطابق وائٹ ہاﺅس کے ذرائع نے بتایا کہ سرکردہ مسلم رہنماﺅں کی جانب سے افطار ڈنر کے بائیکاٹ کے بعد وائٹ ہاﺅس نے تقریب منسوخ کردی ۔کونسل آن امریکن اسلامک ریلیشنز کے ڈپٹی ڈائریکٹر ایڈورڈ احمد مچل نے بتایا کہ تقریب اس لیے منسوخ کی گئی کیونکہ لوگوں کی بڑی تعداد نے شرکت نہ کرنے کا فیصلہ کیا تھا۔
صدر جو بائیڈن کی افطاری کا بائیکاٹ کرنے والوں کی فہرست میں وہ لوگ بھی شامل تھے جنہوں نے اس تقریب میں شرکت کے لئے رضامندی ظاہر کی تھی۔
انہوں نے بتایا کہ امریکی مسلم کمیونٹی نے واضح کر دیا تھا کہ ہمارے لیے وائٹ ہاﺅس کے ساتھ افطار کرنا ناقابل قبول ہو گا جو غزہ میں فلسطینی عوام کو قتل کرنے کے اسرائیلی حکومت کے اقدامات کی حمایت جاری رکھے ہوئے ہیں۔
ناقدین نے خبردار کیاکہ مسلم رہنماﺅں میں غم و غصہ نومبر میں ہونے والے صدارتی انتخابات میں صدر جو بائیڈن کے انتخابی امکانات کے لیے بھی ممکنہ طور پر خطرہ بن سکتا ہے۔