سٹی 42 : وزیر اعلیٰ مریم نوازشریف نے روڈا کی اراضی پر تجاوزات روکنے کیلئے سپیشل پولیس فورس قائم کرنے کی منظوری دیدی ۔
وزیر اعلیٰ مریم نواز کی زیر صدارت راوی اربن ڈویلپمنٹ اتھارٹی سے متعلق خصوصی اجلاس منعقد ہوا جس میں روڈا پراجیکٹس کی تکمیل اور جاری پراجیکٹس پر تفصیلی جائزہ لیا گیا۔ اجلاس میں روڈا کی اراضی پر تجاوزات روکنے کیلئے سپیشل پولیس فورس قائم کرنے کی منظوری دی گئی۔ وزیر اعلیٰ مریم نواز نے روڈا ایریا میں اراضی کی غیر قانونی خریدوفروخت روکنے کا حکم دیا۔
اجلاس میں روڈا پراجیکٹس کی تکمیل کیلئے چین و دیگر بین الاقوامی اداروں سے اشتراک کا فیصلہ بھی کیا گیا۔ بین الاقوامی سطح کا روڈا پراجیکٹ ٹوئن سٹی پر پیش رفت کا بھی جائزہ لیا گیا۔ مریم نواز کو روڈا میں فاریسٹ ایریا 20 فیصد سے بڑھا کر 35 فیصد کرنے پر پیشرفت سے متعلق آگاہ کیا گیا۔ سی ای او روڈا عمران امین نے راوی اربن ڈویلپمنٹ اتھارٹی سے متعلق تفصیلی بریفنگ دی۔
سینیٹر پرویز رشید، سینئر منسٹر مریم اورنگزیب، صوبائی وزیر اطلاعات وثقافت عظمیٰ زاہد بخاری، چیف سیکرٹری، سیکرٹری ہاؤسنگ،سی ای او روڈا عمران امین، پرنسپل سیکرٹری اور دیگر حکام بھی موجود تھے۔