سٹی 42 : لاہور میں’’انڈر ورلڈ‘‘کی لڑائی پھر چھڑ گئی, امیر بالاج قتل کیس کے مرکزی ملزم طیفی بٹ کے بہنوئی کو قتل کردیا گیا، جاوید بٹ مقتول بالاج قتل کیس میں بھی نامزد تھا۔

 امیر بالاج قتل کیس میں نامزد ملزم طیفی بٹ کے بہنوئی جاوید بٹ کو قتل کردیا گیاہے ۔

پولیس کے مطابق اقبال ٹاؤن کا رہائشی جاوید بٹ اپنی اہلیہ کیساتھ بیٹی کوسکول سے لینے کے لیے گلبرگ جارہا تھا، اسی دوران موٹر سائیکل سوارافراد نے ایف سی انڈر پاس کے قریب فائرنگ کردی، فائرنگ کے باعث جاوید بٹ موقع پر ہی جاں بحق ہوگیا ،جبکہ جاوید بٹ کی بیوی گولی لگنے سے زخمی ہوئی ، گاڑی میں جاوید بٹ کی بیٹی بھی سوار تھی جو محفوظ رہی ۔ 

پولیس نےمقتول کی لاش کو پوسٹ مارٹم کے لیے مردہ خانے منتقل کردی، ساتھ ہی جائے وقوعہ سے شواہد اکٹھے کر لئے ۔ 

واضح رہے کہ طیفی بٹ امیر بالاج کے قتل کے بعد تاحال مفرور ہے۔ مقدمہ میں طیفی بٹ کے کزن گوگی بٹ کو بھی نامزد کیا گیا تھا۔ امیر بالاج کو قتل کرنے والا شوٹر مظفر موقع پر ہی مارا گیا تھا، جبکہ اس قتل کے مقدمہ میں امیر بالاج کی مخبری کرنے کے شبہ میں امیر بالاج کا دوست احسن شاہ نامزد تھا ۔جوچندروز قبل مبینہ پولیس مقابلےمیں ماراگیاتھا ۔ 

پولیس کا کہنا ہے کہ  مقتول جاوید بٹ کی میت پوسٹمارٹم کے بعد ورثاء کے حوالے کی جائے گی، واقعہ کے حوالے سے اہل خانہ کے بیانات بھی قلم بند کئے جا رہے ہیں۔ چائے وقوعہ سے ملحقہ سی سی ٹی وی کیمروں، دیگر شواہد کی مدد سے ملزموں کی تلاش جاری ہے ۔