اسرار خان: ٹبی سٹی کے علاقہ میں مسلح ملزمان نے مخالفین پر فائرنگ کر کے 4 افراد کو زخمی کر دیا ، پولیس نے جائے وقوعہ سے شواہد اکٹھے کر کے ملزموں کی تلاش شروع کر دی ۔
پولیس کے مطابق واقعہ سید مٹھا بازار میں پرانی رنجش کی بناء پر جمی گروپ اور صابر علی گروپ کے مابین پیش آیا، جہاں جھگڑے کے دوران جمی گروپ نے فائرنگ کر کے مخالف فریق کے 4 افراد کو زخمی کر دیا ۔
زخمیوں میں 35 سالہ وقاص، 30 سالہ فرزاد، 26 سالہ عبد الرحمٰن اور 60 سالہ صابر شامل ہیں، جنہیں طبی امداد کیلئے میو ہسپتال منتقل کر دیا گیا ۔
پولیس کا کہنا ہے کہ ہسپتال انتظامیہ کی جانب سے تمام زخمیوں کی حالت تسلی بخش بتائی جاتی ہے ، تاہم جائے وقوعہ سے شواہد اکٹھے کر کے فائرنگ میں ملوث ملزموں کی تلاش کی جا رہی ہے ۔