ویب ڈیسک: بالی ووڈ کے بادشاہ شاہ رخ خان نے زندگی کی 59بہاریں دیکھ لیں ،وہ آج اپنی 59 ویں سالگرہ منارہے ہیں۔
گزشتہ شب 12 بجتے ہی انہیں سالگرہ کی مبارک باد دینے کے لیے ان کے چاہنے والے بڑی تعداد میں ہر سال کی طرح ان کی رہائش گاہ "منت" کے باہر جمع ہو گئے۔
مختلف سوشل میڈیا پلیٹ فارمز پر گزشتہ رات "منت" کے باہر بالی ووڈ کنگ کی سالگرہ کا جشن منانے والے مداحوں کی مختلف ویڈیوز وائرل ہو رہی ہیں، شاہ رخ خان کے مداح غبارے اور سالگرہ کے پوسٹرز لیے اداکار کی ایک جھلک دیکھنے کے لیے اُن کے گھر کے باہر کھڑے رہے،انہوں نے رات 12 بجتے ہی سُپر اسٹار کو آتش بازی اور نعرے بازی کے ساتھ سالگرہ کی مبارک باد دی،اس موقع پر کئی مداح کنگ خان کا آئیکونک پوز بناتے ہوئے بھی نظر آئے۔
شاہ رخ خان نے اس موقع پراپنے مداحوں کی محبت کا جواب اپنے گھر کی بالکونی میں آ کر ہاتھ ہلا کردیا،انہوں نے اس موقع پرمداحوں کا شکریہ بھی اداکیا
بھارتی میڈیاکی رپورٹس کے مطابق کنگ خان ہر سال کی طرح اس سال بھی اپنی سالگرہ کا جشن بڑے پیمانے پر نہیں منائیں گے،اس سال بابا صدیقی کے قتل کے سبب ان کی سالگرہ کی تقریب بہت چھوٹے پیمانے پر منعقد ہو گی جس میں صرف قریبی لوگ ہی شرکت کریں گے۔