( علی رضا ) جشن آمد رسول، اللہ ہی اللہ، بی بی آمنہ کے پھول، اللہ ہی اللہ،جشن عید میلاد النبیؐ کی مناسبت سے سٹی نیوز نیٹ ورک کی جانب سے محفل میلاد مصطفی صلی اللہ علیہ وسلم کا انعقاد کیا گیا۔ محفل میلاد میں عاشقان مصطفی صلی اللہ علیہ وسلم نے کثیر تعداد میں شرکت کی۔
ربیع الاول کی مناسبت سے سٹی نیوز نیٹ ورک کے ہیڈ آفس میں محفل میلاد مصطفی صلی اللہ علیہ وسلم کا اہتمام کیا گیا۔ جس میں ملک کے عظیم نعت خوان رفیق ضیاء قادری، حافظ ذیشان بٹ اور دیگر نے شرکت کی اور حضور سرور کونین صلی اللہ علیہ وآلہ وسلم کی بارگاہ میں ہدیہ نعت پیش کیا۔
محفل میلاد میں سٹی نیوز نیٹ ورک کے تمام سٹاف کی کثیر تعداد نے شرکت کی۔ نورانی محفل کے شرکا نے درود و سلام کی صدائیں بلند کیں اور حضور پُرنور حضرت محمد مصطفی صلی اللہ علیہ وسلم کی ولادت کا جشن منایا۔
محفل کے اختتام پر پاکستان اور سٹی نیوز نیٹ ورک کے لئے خصوصی دعا بھی کروائی گئی اور حاضرین محفل کے لئے لنگر و نیاز کا بھی اہتمام کیا گیا۔