(جمال الدین جمالی)ہم کورونا وائرس کی مہلک وبا سے اللہ کی پناہ مانگتے ہیں، رمضان کے بابرکت مہینے میں اہل ایمان گھروں اور مساجد میں کورونا وائرس کے خاتمہ کیلئے دعائیں مانگ رہے ہیں، روزانہ اللہ اکبر کی صدائیں بلند کر رہے ہیں، آج بھی مساجد اور گھروں کی چھتوں سے اذانیں دی گئیں۔
علما کرام کی اپیل پر کورونا وائرس کی مہلک وبا سے اللہ کی پناہ اور رحمت خداوندی کے حصول کیلئے شہر کی تمام بڑی مساجد اور گھروں کی چھتوں سے اذانیں دی گئیں۔ بابرکت ماہ صیام کی مناسبت سے اہل ایمان نے خصوصی دعائیں کیں۔ روزانہ کی طرح رات کے دس بجتے ہی شہر اللہ اکبر کی صداوں سے گونج اٹھا۔ شہری کورونا وائرس سے بچاو کیلئے اللہ کی پناہ اور مدد مانگتے رہے۔
مساجدمیں اور گھروں کی چھتوں پر اذان دینے کے بعد سب نے انفرادی طور پر توبہ استغفار اور خصوصی دعائیں کیں۔ شہریوں نے اللہ سے مدد مانگی تاکہ رب العالمین اذان کی برکت سے کورونا وائرس کی شکل میں پھیلنے والی موذی وبا کا جلد خاتمہ کردے۔
دوسری جانب پنجاب میں کورونا وائرس کے 120 نئے کیسز سامنے آنے کے بعد مجموعی تعداد 6 ہزار 340 جبکہ لاہور میں کورونا وائرس کے 1 ہزار 820 کنفرم مریض ہیں۔
محکمہ پرائمری اینڈ سکینڈری ہیلتھ کے مطابق کورونا وائرس سے اب تک کل 106 اموات ہوئیں،1 ہزار 850 افراد صحت یاب جبکہ 27 مریضوں کی حالت تشویشناک ہے۔ اب تک 82 ہزار651 ٹیسٹ کیے جا چکے ہیں۔
میو ہسپتال میں زیرعلاج تصدیق شدہ مریضوں کی تعداد 238، ایکسپو سنٹر میں 399 تصدیق شدہ مریض، پی کے ایل آئی میں 72، سروسز میں 28، جناح میں 8 ، جنرل میں 4، گنگارام 6 ، 22 مزنگ ہسپتال اور چلڈرن ہسپتال میں کورونا کے 8 مریض زیرعلاج ہیں۔