قیصر کھوکھر : محکمہ داخلہ نے محرم الحرام کی مجالس اور جلوسوں کی سکیورٹی کیلئے ایس او پی جاری کر دئیے ۔مقامی امن کمیٹیاں محرم الحرام کے پُرامن انعقاد کیلئے اپنا کردار ادا کریں گی۔
 محکمہ داخلہ پنجاب نے محرم الحرام میں مجالس کیلئے ایس او پیز جاری کر دیئے ہیں۔ تمام امام بارگاہوں اور مجالس کیلئے فول پروف سکیورٹی انتظامات کی ہدایت کی گئی ہے۔ محکمہ داخلہ نے کہا ہے کہ تمام مجالس کیلئے 3 تہوں پر مشتمل سکیورٹی کور یقینی بنایا جائے۔ مجالس کیلئے ایک داخلی اور خارجی راستہ مختص کیا جائے، تمام حساس مقامات پر واک تھرو گیٹس کی تنصیب لازمی قرار دیا ہے۔ منتظمین مجلس سے قبل فزیکل سکیورٹی چیک کو یقینی بنائیں گے، مجلس میں آنیوالے ہر شہری کو میٹل ڈیٹیکٹر سے لازمی چیک کیا جائے۔ مجلس میں داخل ہونیوالے ہر شخص کی سی سی ٹی وی کیمروں سے فوٹیج بنائی جائے۔ لاؤڈ سپیکر صرف مجلس کی حدود تک استعمال کیا جائے اور وقت کی پابندی لازمی کروائی جائے، منتظمین یقینی بنائیں کہ ذاکرین متنازعہ تقاریر نہ کریں۔ مقامی امن کمیٹیاں محرم الحرام کے پُرامن انعقاد کیلئے اپنا کردار ادا کریں۔