سٹی42: چیف آف آرمی سٹاف جنرل عاصم منیر نے کہا ہے کہ نام نہاد دوست نما دشمن کچھ بھی کریں ان کو قوم اور مسلح افواج کی مربوط طاقت سے شکست ہوگی۔
آئی ایس پی آر کے مطابق آرمی چیف جنرل سید عاصم منیر نے یہ باتیں بلوچستان کے دورہ کے دوران دہشتگردوں اور شر پسند سازشیوں سکے ساتھ پیچیدہ لڑائی لڑنے میں مصروف سکیورٹی آفیسرز کے ساتھ گفتگو کرتے ہوئے کہیں۔
آرمی چیف جنرل عاصم منیر نے کل بلوچستان کا دورہ کیا تو انہیں بلوچستان کی موجودہ سیکیورٹی صورتحال پربریفنگ دی گئی جس میں سینیئر سکیورٹی اور انٹیلی جنس حکام نے بھی شرکت کی۔
بلوچستان کے دورہ کے دوران جنرل سید عاصم منیر نے قلات میں دہشتگردوں کے ساتھ جھڑپ میں شہید ہونے والے اہلکاروں کی نمازِ جنازہ میں بھی شرکت کی۔ گورنر اور وزیراعلیٰ بلوچستان کبھی ان کے ساتھ شہدا کی نماز جنازہ میں شامل ہوئے۔
آرمی چیف نے سی ایم ایچ کوئٹہ میں قلات کی جھڑپ میں زخمی جوانوں کی عیادت کی اورملک کے دفاع کیلئے جوانوں کے غیر متزلزل عزم کو سراہا۔
بلوچستان میں فورسز کی کارروائیوں میں 23 دہشتگرد ہلاک ہوئے، اس مقابلے میں ایف سی کے 18 جوان شہید ہوئے۔
آرمی چیف نے کہا کہ نام نہاد دوست نما دشمن کچھ بھی کریں ان کو شکست ضرور ملے گی، دشمنوں کو قوم اور مسلح افواج کی مربوط قوت سے شکست ہوگی۔
جنرل عاصم منیر نے کہا کہ اپنے غیر ملکی آقاؤں کے ایجنٹ بن کر دُہری پالیسیوں کی پیروی کرنے والوں سے آگاہ ہیں، وطن کے دفاع کیلئے جب بھی ضرورت پڑی ہم جوابی کارروائی کریں گے اور دفاع وطن کیلئے جب بھی ضرورت پڑی، یہ لوگ جہاں کہیں بھی ہوں گے، ان کا پیچھا کیا جائے گا، یہ دشمن ہماری قوم اور مسلح افواج کی ثابت قدمی سے ضرور شکست کھائیں گے۔
آرمی چیف نے قانون نافذ کرنے والے اداروں کے بہادر افسروں اور جوانوں کی دہشتگردی کے خلاف کاوشوں کو سراہا اور بلوچستان کے عوام کی سلامتی اور فلاح و بہبود کو یقینی بنانے کے عزم کا اعادہ کیا۔
چیف نے امن اورترقی کو فروغ دینے کی کوششوں میں صوبائی حکومت کی حمایت جاری رکھنےکے عزم کا بھی اعادہ کیا۔
بلوچستان کے علاقے قلات اور ہرنائی میں سکیورٹی فورسز نے کارروائیاں کرتے ہوئے 23 دہشتگردوں کو جہنم واصل کر دیا جبکہ مقابلے میں ایف سی کے 18 بہادر جوانوں نے جام شہادت بھی نوش کیا۔ 31 جنوری اور یکم فروری کی رات دہشتگردوں نے روڈ بلاک کرنے کی کوشش کی تھی، سکیورٹی فورسز اور قانون نافذ کرنے والے ادارے فوری متحرک ہوئے اور سکیورٹی فورسز نے دہشتگردوں کے مذموم عزائم کو کامیابی سے ناکام بنایا۔