(سعید احمد) شیخ رشید کا نئی ٹرینیں چلانے کا جنون ختم ہوگیا، وفاقی وزیر ریلوے نے کچھ عرصہ قبل چلائی گئی 2 نئی ٹرینیں بند کرنے کا فیصلہ کرلیا، بند کی جانے والی ٹرینوں کا افتتاح وزیراعظم عمران خان نے کیا تھا۔
ذرائع کے مطابق لاہور سے راولپنڈی اور راولپنڈی سے لاہور آنے والی دونوں ٹرینیں راولپنڈی ایکسپریس 15 ستمبر 2019ء سے بند کرنے کا فیصلہ کر لیا گیا ہے، اس حوالے سے ریزرویشن آفس کو دونوں ٹرینوں کی بکنگ بند کرنے کی ہدایات بھی جاری کر دی گئی ہیں۔
پنڈی ریل کار کا افتتاح عمران خان نے 15 ستمبر 2018ء کو وزیر اعظم ہاؤس میں بیٹھ کر ہی کیا تھا، فیصلہ ٹرینوں کی کم آکوپینسی کے باعث کیا گیا۔
ذرائع کے مطابق لاہور سے جانے والی 109 اپ کی آکوپینسی 56 فیصد جبکہ راولپنڈی سے لاہور آنے والی ٹرین 110 ڈاؤن کی آکوپینسی 36 فیصد رہی، مجموعی طور پر ایک سال میں دونوں ٹرینوں کی آکوپینسی 46 فیصد رہی جسکے باعث محکمہ کو بہت زیادہ خسارہ ہوا۔