ویب ڈیسک: بھارتی ٹینس اسٹار ثانیہ مرزا کے بعد سابق پاکستانی کرکٹر شعیب ملک نے بھی بیٹے اذہان کی چھٹی سالگرہ منانے کی ویڈیو شیئر کردی۔
ثانیہ مرزا اور شعیب ملک نے اپنی 14 سالہ شادی کے دوران بیٹے کی 5 سالگرہ ساتھ منائیں جن میں وہ اکثر بڑی تقریب کا اہتمام کرتے تھے لیکن پہلی مرتبہ ثانیہ مرزا اور شعیب ملک نے اذہان مرزا ملک کی سالگرہ الگ الگ منائی ہے۔
شعیب ملک نے فوٹو اینڈ ویڈیو شیئرنگ ایپ انسٹاگرام پر ایک پوسٹ شیئر کی جس میں وہ بیٹے کے چھ سال کے ہوجانے پر بے انتہا خوش نظر آئے۔اپنے پیغام میں شعیب ملک نے تحریر کیا کہ سالگرہ مبارک چیمپئن، دعا ہے کہ آنے والے سال خوشیوں سے بھرے ہوں، آپ ہمارے لیے باعث فخر بنو۔
شعیب ملک بیٹے کی سالگرہ منانے کے بعد ایونٹ میں شرکت کےلیے ریاض چلے گئے۔
دوسری جانب ثانیہ مرزا نے بھی اذہان کی سالگرہ کی مختصر سی تقریب منعقد کی جس میں ان کے قریبی چند افراد شریک ہوئے جبکہ شعیب اکیلے ہی دبئی میں بیٹے کے ساتھ کیک کاٹتے نظر آئے۔
واضح رہے کہ پاکستانی کرکٹر شعیب ملک اور بھارتی ٹینس اسٹار ثانیہ مرزا نے اپنے بیٹے اذہان کی چھٹی سالگرہ الگ الگ منائی۔ دونوں نے بیٹے کی سالگرہ منانے کی پوسٹس بھی سوشل میڈیا پر شیئر کیں۔
یاد رہے کہ شعیب ملک اور ثانیہ مرزا سال 2010 میں رشتہ ازدواج میں منسلک ہوئے تھے جس کے بعد ان کی پہلی اور اکلوتی اولاد بیٹا اذہان مرزا ملک 2018 میں پیدا ہوا تھا۔دونوں سیلیبریٹز کے درمیان طویل عرصے سے اختلافات کی خبریں تھیں جس کے بعد گزشتہ برس دونوں نے بالکل آخر راہیں جدا کرلیں۔ شعیب ملک نے رواں سال کے آغاز پر پاکستانی اداکارہ ثناء جاوید سے شادی کرلی تاہم ثانیہ مرزا نے تاحال دوسری شادی کا فیصلہ نہیں لیا ہے اور بیٹے کی کسٹڈی بھی ان ہی کے پاس ہے اب وہ والدین، بہن اور دوستوں کے ساتھ زیادہ وقت گزارتی نظر آتی ہیں۔