راؤ دلشاد  : پنجاب حکومت کی جانب سے 167 سال بعد مری کے تاریخی مال روڈ کی توسیع اور بحالی کا منصوبہ تیار کیا گیا ہے، منصوبہ پاکستان مسلم لیگ (ن) کے صدر اور سابق وزیراعظم نواز شریف کے مری ٹورازم ڈویلپمنٹ پلان کا حصہ ہے ۔ 

550 ملین روپے کی لاگت سے  منصوبے پر والڈ سٹی اتھارٹی لاہور عمل درآمد کرانے گی، ماہرین کی مدد سے مری کو اس کے قدیمی حسن کے مطابق بحال کرے گی، والڈ سٹی اتھارٹی لاہور مری کی مقامی آبادی اور انتظامیہ سے بھی مدد اور مشاورت لے گی ۔ پنجاب کی سینئیر صوبائی وزیر مریم اورنگزیب مری ڈویلپمنٹ کمیٹی کی سٹیرنگ کمیٹی کی کی سربراہ ہیں۔ 

ایک سال کے عرصے میں مری روڈ کی تاریخی خوبصورتی بحال کی جائے گی، جہاں تاریخی پیدل راستے بحال، صفائی ستھرائی مثالی اور تمام سہولیات فراہم کی جائیں گی، اس کے علاوہ مال روڈ پر موجود دکانوں اور عمارتوں کو قدیمی تعمیراتی آنداز میں بحال کیا جائے گا ، دکانوں اور عمارتوں پر لگے تشہیری بورڈ بھی ایک ہی شکل اور معیار کے ہوں گے۔ عمارتوں کو تاریخی انداز کے برقی قمقموں سے روشن کیا جائے گا ۔ 

قدیم تاریخ کو زندہ کرتے ہوئے عوام کے بیٹھنے کے لئے پبلک سکوائر (چوراہا) بنایا جائے گا، جہاں سیاحوں اور عام عوام کی سہولت کے لیے معیاری واش رومز تعمیر ہوں گے ۔ 

پنجاب کی وزیر اعلی مریم نواز نے کہا ہے کہ مری کی ماضی کی سیاحتی شان بحال کریں گے، معیار پر سمجھوتہ نہیں ہوگا، مری کو عالمی سیاحتی سہولیات کا مرکز بنانا ہے۔ انہوں نے کہا کہ مری پاکستان اور پنجاب کی سیاحت کے فروغ کا ماڈل بنے گا۔ 

مریم نواز نے کہا کہ گلاس ٹرین کا منصوبہ، جدید سہولیات سے آراستہ ہسپتال کی تعمیر اس منصوبے کو مزید چار چاند لگائے گی ۔