سٹی42:  سابق سوویت جمہوریہ جارجیا کی پولیس نے ہفتے کے روز  دارالحکومت تبلیسی میں رات بھر احتجاج کے دوران 107 افراد کو گرفتار کر لیا ہے۔

جمعے اورہفتے کی درمیانی رات  ہزاروں افراد جارجیا بھر میں مظاہروں کی تیسری رات کے لیے دوبارہ جمع ہوئے۔

حکومت کی جانب سے یورپی یونین کے ساتھ الحاق کے مذاکرات کی معطلی کے ردعمل میں یہ مظاہرے، اکتوبر کے پارلیمانی انتخابات میں حکمران  جارجین ڈریم پارٹی کی متنازعہ جیت کے بعد حالیہ ہفتوں میں سب سے بڑے مظاہرے ہیں۔ ڈریم پارٹی کو یورپی یونین کے ساتھ جانے سے زیادہ دلچسپی نہیں۔ اسے روس کی حامی پارٹی تصور کیا جاتا ہے اور اس کے ووٹر بھی روس کے ساتھ تعلقات کو یورپی یونین کے ساتھ تعلق بنانے پر فوقیت دیتے ہیں۔

گرفتاریاں کیوں ہوئیں؟
ہزاروں مظاہرین جمعے کی شام اور ہفتے کے روز تبلیسی میں جمع ہوئے تھے۔ جمعرات کو صدر، سلوم زورا بیچولی، مظاہرین میں شامل ہوئے اور حکومت پر الزام لگایا کہ وہ مظاہروں پر کریک ڈاؤن کرتے ہوئے اپنے ہی لوگوں کے خلاف "جنگ" کا اعلان کر رہی ہے۔ یہ مظارے بنیادی طور پر موجودہ حکومت پر دباؤ ڈالنے کے لئے ہو رہے ہیں کہ وہ یورپی یونین کے ساتھ جارجیا کو شامل رکنے کے لئے مذاکرات فوراً بحال کرے۔ 

ہفتے کے روز  ایک غیر ملکی میڈیا آؤٹ لیٹ سے گفتگو کرتے ہوئے  صدر زورابیچولی نے احتجاج کرنے والوں پر  واٹر کینن کے استعمال اور گرفتاریوں کی مذمت کی بلکہ اسے "مظاہرین کے خلاف منظم تشدد" بھی کہا۔ انہوں نے کہا کہ تشدد جارجیا کے ووٹروں کے خلاف کیے گئے پچھلے غلط کی عکاسی کرتا ہے جب وہ "انتخابات میں آواز اٹھانے سے محروم تھے۔"

زورا بیچولی کا کہنا ہے کہ وہ دستبردار نہیں ہوں گی۔

زورابیچولی نے جارجیا کی موجودہ  پارلیمنٹ کو ناجائز قرار دیا اور کہا کہ اس وقت ملک میں واحد جائز ادارہ صدر ہے۔ اس طرح، اس نے ہفتے کے روز کہا کہ وہ دسمبر میں اپنی مدت ختم ہونے پر اپنا عہدہ چھوڑنے کا ارادہ نہیں رکھتی ہیں۔

جارجیا کی وزارت داخلہ نے کہا ہے کہ مظاہرے "اسمبلیوں اور ریلیوں کے لیے قانون کے مقرر کردہ اصولوں سے تجاوز کر گئے ہیں۔"

وزارت نے دعویٰ کیا کہ مظاہرین نے پولیس افسران پر پتھراؤ کیا اور اشیاء کو جلا دیا۔ تبلیسی کی مرکزی سڑک رستاویلی ایونیو پر جمع ہونے والے مظاہرین پر پولیس نے آنسو گیس اور واٹر کینن سے فائر کیا۔

مظاہرین نے دیسی ساختہ رکاوٹیں کھڑی کیں اور آتش بازیاں چلا کر پولیس کو پیچھے ہٹانے کی کوشش کی۔

بٹومی، سگدیدی، اور ملک بھر کے دیگر شہروں سے یورپی یونین کے حامی ریلیوں کی بھی اطلاع ملی۔ خیال کیا جاتا ہے کہ گرفتاریاں جارجیا کے دوسرے بڑے شہر باتومی میں بھی کی گئیں۔

جارجیا کی صدر نے یورپی یونین کے حامی مظاہروں کی حمایت کی۔ زورابیچولی نے بتایا کہ مظاہروں کا پیمانہ نیا تھا، جو پہلی بار ملک کے ہر بڑے شہر میں پھیل گئے ہیں۔ انہوں نے یہ بھی نوٹ کیا کہ پبلک سیکٹر کے متعدد ملازمین نے احتجاجی خطوط پر دستخط کرنے کے ساتھ ساتھ اپنے عہدوں سے استعفیٰ دینا شروع کر دیا ہے،  استعفے دینے والوں میں سفارتی کور میں شامل کچھ لوگ شامل ہیں۔

جارجیا میں مظاہرے کیوں ہو رہے ہیں؟
حکمران جارجیائین ڈریم پارٹی نے جمعرات کو کہا کہ حکومت 2028 تک یورپی یونین میں شمولیت پر بات چیت کو معطل کر دے گی– حکومت نے مؤثر طریقے سے اگلے چار سالوں کے لیے  یورپی یونین کے بلاک میں شامل ہونے کی اپنی درخواست کو روک دیا ہے۔

اس اقدام نے متنازعہ انتخابات کے بعد اقتدار میں رہنے والی جارجیائین ڈریم پارٹی کی مخالفت کو تقویت بخشی، اپوزیشن کو خدشہ تھا کہ حکومت یورپ سے منہ موڑ نے کے بعد روس کو جارجیا میں دوبارہ اثر و رسوخ کی اجازت دے گی۔

صدر زورابیچولی نے موجودہ صورتحال کو "اقتدار پر قبضے اور جارجیا کو روس کی طرف گھسیٹنے کی کوشش کے خلاف بڑے پیمانے پر قومی احتجاج" قرار دیا۔انہوں نے کہا کہ جارجیائی عوام یورپ سے دور  ہٹنے اور اور ماسکو کی طرف جانے کے  اس "بنیاد پرست موڑ" کو مسترد کرتے ہیں جو موجودہ "ناجائز حکومت" نے بنایا ہے -  انہوں نے مزید کہا کہ "ڈیفیکٹو حکومت" نہ صرف جارجیائی عوام کی مرضی کو نظر انداز کر رہی ہے بلکہ آئین کی خلاف ورزی بھی کر رہی ہے۔

ڈریم پارٹی کی حکومت کیا چاہتی ہے

وزیر اعظم اراکلی کوباخیتس  Irakli Kobakhidze کی حکومت اور یورپی یونین کے درمیان کئی معاملات پر کئی مہینوں سے اختلاف رہا ہے، لیکن اکتوبر کے آخر میں جارجیا میں مبینہ طور پر  متنازعہ انتخابات کے بعد اس میں شدت آگئی۔ برسلز نے "غیر ملکی ایجنٹوں" اور ایل جی بی ٹی کے حقوق کو روکنے کے نئے منظور شدہ قوانین پر تبلیسی کی یورپی یونین میں شمولیت کی درخواست پہلے ہی منجمد کر دی تھی۔

جارجین ڈریم 2008 میں علیحدگی پسند ابخازیہ اور جنوبی اوسیشیا کے کنٹرول پر روس کے ساتھ ایک مختصر جنگ کے بعد کریملن کے ساتھ تعلقات کو معمول پر لانے کے حق میں ہے۔