(ویب ڈیسک)کورونا وائرس کی چوتھی لہر نے حکومت کا سخت فیصلے کرنے پر مجبور کردیا، وفاق کو ملک میں مکمل لاک ڈاؤن لگانے کی تجویز،وزیراعظم عمران خان نے مکمل لاک ڈاؤن کو مسترد کرتے اہم بیان جاری کردیا۔
تفصیلات کے مطابق کورونا کی چوتھی لہر میں بڑھتی ہوئی شدت کے پیش نظر حالات سنگین ہورہے ہیں، ملک میں گزشتہ روز 3 ماہ بعد 5ہزار سے زائد نئے کیسزسامنے آئے جبکہ 9 مئی کے بعد مثبت کیسز کی سب سے زیادہ شرح رہی، گزشتہ 24 گھنٹوں میں مہلک وائرس 62 زندگیاں نگل گیا،کورونا کے مثبت کیسز کی شرح بھی 9 فیصد کے قریب پہنچ گئی،چوبیس گھنٹوں میں کورونا کے 5ہزار26 نئے کیس سامنے آئے۔
حکومت کو ملک میں مکمل لاک ڈاؤن لگانے کی تجویزدی گئی،وزیراعظم عمران خان نے مکمل لاک ڈاؤن کو مسترد کرتے ہوئے کہا کہ لاک ڈاؤن لگاتے ہیں تو ہمیں دوسری طرف بھی دیکھنا ہے،کیا لاک ڈاؤن سے ہم اپنی معیشت کو بچالیں گے؟
لائیو سیشن میں وزیراعظم نے اظہار خیال کرتے ہوئے کہا کہ اسوقت پاکستان میں کورونا کی چوتھی لہر آئی ہے، بھارتی ویرینٹ ڈیلٹا سب سے زیادہ خطرناک ہے، یہ زیادہ تیزی سے پھیلتا ہے،وبھارت میں حکومت نےبغیر سوچے لاک ڈاؤن کیا، بھارتی حکومت نے اوپر کی کلاس کا سوچا اور لاک ڈاؤن لگادیا،محنت کش لوگوں کا نہیں سوچا،صرف ایلیٹ کی جانب دیکھا۔
وزیراعظم نے کہا کہ سندھ حکومت کی کوشش تھی کہ لاک ڈاؤن کردیں، مانتا ہوں کہ لاک ڈاؤن بالکل ٹھیک فیصلہ ہے اس کا پھیلاؤ کم ہوجائےگا، مگر لاک ڈاؤن لگاتے ہیں تو ہمیں دوسری طرف بھی دیکھنا ہے، دیہاڑی دار طبقہ ، ٹیکسی والے چھوٹے مزدور کیسے گزاراکرینگے؟ بچے گھر میں بھوکیں ہونگے تو کیسے کہیں گے کہ باہر نہ جائیں۔
لائیو سیشن میں وزیراعظم نے کہا کہ کورونا کا پھیلاؤ روکنا اور معیشت کو ساتھ لیکر چلنا ہے، ہماری معیشت مشکل وقت سے نکلی اور اللہ کےکرم سےاوپر جارہی ہے، ہمیں کسی صورت لاک ڈاؤن لگاکر معیشت کو تباہ نہیں کرنا ،حکمت عملی کے تحت ہمیں کورونا کا پھیلاؤ روکنا ہوگا۔
وزیراعظم کا کہنا تھا کہ اب تک ملک بھر میں تین کروڑ افراد کو کرونا ویکسین لگ چکی، حکومت پوری کوشش کررہی ہے کہ ویکسینیشن میں کوئی کمی نہ آئے، سکولوں سے متعلق میرا نظریہ یہ ہے کہ جب تک سکولز کے اساتذہ عملے کو ویکسین نہ لگے تو نہیں کھولنےچاہئیں۔
واضح رہے کہ محکمہ پرائمری اینڈ سیکنڈری ہیلتھ کیئر کے جاری کردہ اعدادوشمار کے مطابق لاہور سمیت پنجاب بھرمیں ویکسی نیشن کا ایک نیا ریکارڈ بننے لگا ہے،گزشتہ چوبیس گھنٹوں کے دوران لاہور سمیت صوبہ بھر میں مجموعی طور پر 549,675 افراد کو ویکسین لگائی گئی ،یہ صوبے میں کسی بھی ایک دن میں کی گئی ویکسینیشن کا اب تک کا سب سے بڑا ریکارڈ ہے۔